​អាមេរិក៖ លោក​ប្រធានាធិបតី Joe Biden បាន​និយាយ​កាលពី​ថ្ងៃអាទិត្យ​ថា សហរដ្ឋអាមេរិក​កំពុង "​បន្ត​រង​ទុក្ខ​" ដោយសារ​ការសម្រេចចិត្ត​របស់​អតីត​ប្រធានាធិបតី Donald Trump ក្នុង​ការ​ដក​ខ្លួន​ចេញពី​កិច្ចព្រមព្រៀង​នុយក្លេអ៊ែរ​អ៊ីរ៉ង់​។ ​លោក Biden បាន​ប្រាប់​អ្នកយកព័ត៌មាន​នៅ​ក្នុង​សន្និសីទ​សារព័ត៌មាន​មួយ​នៅ​ជំនួប G20 ក្នុង​ទីក្រុង​រ៉ូម ដោយ​ប្រើ​ពាក្យកាត់​សម្រាប់​ឈ្មោះ​ផ្លូវការ​នៃ​កិច្ចព្រមព្រៀង​នុយក្លេអ៊ែរ​ផែនការ​សកម្មភាព​រួម​គ្រប់​ជ្រុងជ្រោយ​ថា ​យើង​កំពុង​បន្ត​ទទួលរង​គ្រោះ​ដោយសារតែ​ការសម្រេចចិត្ត​ដ៏​អាក្រក់​បំផុត​ដែល​ប្រធានាធិបតី Trump បាន​ធ្វើ​ក្នុង​ការ​ដក​ខ្លួន​ចេញពី​កិច្ចព្រមព្រៀង​នុយក្លេអ៊ែរ JCPOA។

​កិច្ចព្រមព្រៀង​នុយក្លេអ៊ែរ​អ៊ីរ៉ង់​ត្រូវ​បាន​បោះបង់ចោល​ ដោយ​សហរដ្ឋអាមេរិក​ក្រោម​រដ្ឋបាល​របស់​លោក Trump ហើយ​កិច្ចពិភាក្សា​ដើម្បី​ស្រោចស្រង់​កិច្ចព្រមព្រៀង​ឡើងវិញ​នៅ​ទីក្រុង​វី​យែ​នប្រទេស​អូស​ទ្រី​ស ត្រូវ​បាន​ផ្អាក​កាលពី​ចុងខែ​មិថុនាបន្ទាប់ពី​ជុំ​ទី​៦ ​រវាង​អ៊ីរ៉ង់ ចិន អាល្លឺម៉ង់ បារាំង រុស្ស៊ី ចក្រភព​អង់គ្លេស និង​ដោយ​ប្រយោល​ជាមួយ​សហរដ្ឋអាមេរិក​។ រដ្ឋបាល​លោក Biden បាន​សន្យា​ថា​នឹង​ចូល​ទៅ​ក្នុង​កិច្ចព្រមព្រៀង​ឡើងវិញ ប៉ុន្តែ​ក្រុម​អ្នកចរចា​របស់​ប្រធានាធិបតី​ត្រូវ​ប្រឈម​នឹង​ការពិភាក្សា និង​ការសម្រេចចិត្ត​ដ៏​តឹងតែង​អំពី​របៀប​ដែល​ត្រូវ​អនុវត្តន៍​។​

​លោក Biden បាន​ជួប​ប្រជុំ​ជាមួយ​មេដឹកនាំ​ប្រទេស​ចំនួន​ ៣ ​ដែល​ជា​ភាគី​នៃ​កិច្ចព្រមព្រៀង​នោះរួមមាន​អធិការបតី​អាល្លឺម៉ង់​លោកស្រី Angela Merkel, លោក​ប្រធានាធិបតី​បារាំង Emmanuel Macron និង​លោកនាយក​រដ្ឋមន្ត្រី​អង់គ្លេស Boris Johnson កាលពី​ថ្ងៃ​សៅរ៍​នៅ​ឯ​ជំនួប​កំពូល G20។ បន្ទាប់មកមេដឹកនាំ​បាន​និយាយពួក​លោក "​ជឿ​ជាក់​ថា​ វា​អាច​ទៅ​រួច​យ៉ាង​ឆាប់រហ័ស​ដើម្បី​ឈាន​ដល់ និង​អនុវត្ត​ការ​យល់​ដឹង​មួយក្នុង​ការ​វិលត្រឡប់​ទៅ​រក​ការ​អនុលោម​តាមច្បាប់​ពេញលេញ​" នៃ​កិច្ចព្រមព្រៀង​នុយក្លេអ៊ែរ​អ៊ីរ៉ង់​៕

អត្ថបទ៖ សុខមាន