នៅក្នុងពេលដែលយោធាកូរ៉េខាងត្បូង ស្ថិតក្រោមការត្រួតពិនិត្យ ជុំវិញតួនាទីរបស់ខ្លួនក្នុងអំឡុងពេលច្បាប់អាជ្ញាសឹកដ៏ចម្រូងចម្រាស មន្ត្រីជាន់ខ្ពស់ម្នាក់កាលពីថ្ងៃអង្គារសប្ដាហ៍នេះ បានចុះទៅពិនិត្យតំបន់គ្មានយោធាដែលខណ្ឌចែកឧបទ្វីបកូរ៉េ ដើម្បីបញ្ជាក់ពីការត្រៀមខ្លួនរបស់កងទ័ពទីក្រុងសេអ៊ូល នៅពេលដែលពួកគេប្រឈមមុខនឹងកូរ៉េខាងជើង។

ដំណើរទស្សនកិច្ចរបស់លោកឧត្តមនាវីឯក គីម ម្យ៉ុងសូ (Kim Myung-soo) ប្រធានអគ្គសេនាធិការចម្រុះនេះ ក៏ស្ថិតក្នុងន័យបង្ហាញកម្លាំងផងដែរថា បើទោះបីមានភាពចលាចលក្នុងនយោបាយកូរ៉េខាងត្បូងជាពិសេសទាក់ទងនឹងប្រមុខទ័ពជាន់ខ្ពស់ជាច្រើនក៏ដោយ ក៏កងកម្លាំងប្រដាប់អាវុធរបស់ប្រទេសនេះ មិនមានភាពផុយស្រួយ និងមិនបានបាត់បង់ការត្រៀមខ្លួនដូចការលើកឡើងមួយចំនួននោះទេ។

ការផ្ញើសារថាកងកម្លាំងប្រដាប់អាវុធនៅតែប្រុងជើងការជានិច្ចនេះ កើតឡើងនៅពេលវេលាដ៏សំខាន់សម្រាប់ទីក្រុងសេអ៊ូល ដោយមេទ័ពជាន់ខ្ពស់មួយចំនួនរបស់ប្រទេសត្រូវបានចាប់ខ្លួន បណ្តេញចេញពីមុខតំណែង ឬស្ថិតក្រោមការស៊ើបអង្កេតពាក់ព័ន្ធនឹងការប្រកាសច្បាប់អាជ្ញាសឹករយៈពេលខ្លីរបស់លោកប្រធានាធិបតី Yoon Suk Yeol កាលពីថ្ងៃទី០៣ ខែធ្នូ។

សម្រាប់ប្រជាជនកូរ៉េខាងត្បូងជាច្រើន វិបត្តិនយោបាយនេះគឺជាការរំឮកមិនល្អមួយដល់ការគ្រប់គ្រងដ៏ឃោរឃៅរបស់យោធាជាបន្តបន្ទាប់នៅក្នុងទីក្រុងសេអ៊ូល ក្នុងអំឡុងទសវត្សរ៍ឆ្នាំ ១៩៧០ និង ១៩៨០។ ទោះជាលោក Yoon ត្រូវផ្អាកពីតំណែងបន្ទាប់ពីការបោះឆ្នោតចោទប្រកាន់ទម្លាក់តំណែងកាលពីថ្ងៃសៅរ៍សប្ដាហ៍មុន ហើយឥឡូវនេះស្ថិតនៅក្រោមការស៊ើបអង្កេតជាផ្លូវការក៏ដោយ សំណួរជាច្រើនពីតួនាទីយោធា ក្នុងប៉ះទង្គិចរយៈពេលខ្លីដោយសារច្បាប់អាជ្ញាសឹកនោះ នៅតែជាប្រធានបទក្ដៅគគុក៕