ព្រឹទ្ធសមាជិកទ្វេបក្សរបស់អាមេរិក កាលពីថ្ងៃព្រហស្បតិ៍ (១៩ ធ្នូ) បានជំរុញឱ្យលោកប្រធានាធិបតី Joe Biden បន្តទុករយៈពេល ៩០ថ្ងៃបន្ថែមពីលើថ្ងៃផុតកំណត់ ១៩ មករា សម្រាប់ក្រុមហ៊ុន ByteDance ដែលមានមូលដ្ឋាននៅចិន ក្នុងការលក់កម្មវិធីវីដេអូខ្លី TikTok នៅសហរដ្ឋអាមេរិក ឬមិនដូច្នេះនឹងប្រឈមការហាមឃាត់។

តុលាការកំពូល និយាយថាខ្លួននឹងពិចារណាលើបញ្ហាប្រឈមផ្លូវច្បាប់របស់ TikTok និង ByteDance ក្នុងការស្វះស្វែងរកដីកាបញ្ឈប់ការហាមឃាត់ ឬការលក់នេះ ហើយនឹងបើកសវនាការនៅថ្ងៃទី១០ ខែមករា។ ក្រុមព្រឹទ្ធសមាជិកបានផ្ញើលិខិតជូនលោក Biden ថា "ដោយសារតែភាពមិនប្រាកដប្រជានៃបម្រាមនេះ ពួកយើងស្នើឱ្យទុកពេល ៩០ថ្ងៃបន្ថែម មុនបម្រាម ១៩ មករា មកដល់"។

អ្នកតតាំងផ្លូវច្បាប់ទាំងនោះកំពុងប្តឹងឧទ្ធរណ៍ចំពោះសេចក្តីសម្រេចរបស់តុលាការជាន់ទាប ចំពោះច្បាប់ដែលនឹងហាមប្រាមប្រតិបត្តិការរបស់ TikTok ដែលប្រើប្រាស់ដោយជនជាតិអាមេរិកប្រហែល ១៧០លាននាក់។

សភាបានអនុម័តវិធានការនេះកាលពីខែមេសា ហើយលោកប្រធានាធិបតី Joe Biden បានចុះហត្ថលេខាឱ្យក្លាយជាច្បាប់ពេញលេញ។ ក្រសួងយុត្តិធម៌ បាននិយាយថា ក្នុងនាមជាក្រុមហ៊ុនចិន TikTok បង្កជា "ការគំរាមកំហែងសន្តិសុខជាតិនៃជម្រៅ និងទំហំដ៏ធំសម្បើម" ប៉ុន្តែ TikTok និយាយថា ខ្លួនមិនបង្កការគំរាមកំហែងដល់សន្តិសុខអាមេរិកអ្វីនោះទេ ហើយប្ដេជ្ញាតតាំងដល់ទីបញ្ចប់។

ប្រធានាធិបតីជាប់ឆ្នោតរបស់បក្សសាធារណរដ្ឋ លោក Donald Trump ដែលបានព្យាយាមហាមឃាត់ TikTok ប៉ុន្តែមិនជោគជ័យក្នុងអំឡុងអាណត្តិសេតវិមានដំបូងរបស់ខ្លួនកាលឆ្នាំ២០២០នោះ បានផ្លាស់ប្តូរជំហររបស់លោក ហើយបានសន្យាថាលោកនឹងព្យាយាមជួយសង្គ្រោះ TikTok៕