សារព័ត៌មាន Sky News បានរាយការណ៍កាលពីថ្ងៃព្រហស្បតិ៍ថា រដ្ឋាភិបាលអៀរឡង់ នឹងស្នើឲ្យតុលាការយុត្តិធម៌អន្តរជាតិ (ICJ) ពង្រីកនិយមន័យរបស់ខ្លួននៃអំពើប្រល័យពូជសាសន៍ ជុំវិញ«ការដាក់ទណ្ឌកម្មរួម»របស់អ៊ីស្រាអែល ទៅលើជនស៊ីវិល នៅតំបន់ហ្កាហ្សាស្ទ្រីប។  

ឧបនាយករដ្ឋមន្ត្រីអៀរឡង់ លោក Micheal Martin បាននិយាយថា រដ្ឋាភិបាលរបស់លោក មាន «ការព្រួយបារម្ភថា៖«ការបកស្រាយមានលក្ខណៈចង្អៀតនៃអ្វី ដែលជាអំពើប្រល័យពូជសាសន៍» កំពុងនាំឲ្យមាន«វប្បធម៌និទណ្ឌភាព ដែលការការពារជនស៊ីវិល ត្រូវបានកាត់បន្ថយ»។

លោកបានបន្ថែមថា មាន «ការដាក់ទណ្ឌកម្មរួមទៅលើប្រជាជនប៉ាឡេស្ទីន តាមរយៈចេតនា និងផល    ប៉ះពាល់នៃសកម្មភាពយោធារបស់អ៊ីស្រាអែល នៅតំបន់ហ្កាហ្សា» ហើយថា រដ្ឋាភិបាលអៀរឡង់ «ផ្តល់អាទិភាព ដល់ការការពារជីវិតជនស៊ីវិល»។

ប្រទេសអៀរឡង់ គ្រោងនឹងភ្ជាប់សំណើនេះ ទៅនឹងករណីដែលអាហ្វ្រិកខាងត្បូងបានប្តឹងទៅកាន់តុលាការ ICJ ក្រោមអនុសញ្ញាប្រល័យពូជសាសន៍របស់អង្គការសហប្រជាជាតិ ក៏ដូចជាសំណុំរឿងដែលប្រទេសហ្គាំប៊ី បានប្តឹងប្រឆាំងនឹងមីយ៉ាន់ម៉ាដែរ។

លោក Martin បាននិយាយថា៖«តាមរយៈការធ្វើអន្តរាគមន៍តាមផ្លូវច្បាប់ក្នុងសំណុំរឿងរបស់ប្រទេស   អាហ្វ្រិកខាងត្បូង អៀរឡង់នឹងស្នើសុឲ្យតុលាការ ICJ ពង្រីកការបកស្រាយរបស់ខ្លួនអំពីអ្វីដែលជាការប្រព្រឹត្តអំពើប្រល័យពូជសាសន៍ដោយរដ្ឋមួយ»។