ឆ្នាំ២០២៥ នឹងក្លាយជាឆ្នាំនៃការគិតគូរយ៉ាងម៉ត់ចត់ សម្រាប់នាយករដ្ឋមន្ត្រីអ៊ីស្រាអែល លោក Benjamin Netanyahu និងសម្រាប់គូរិដ៏ស្រួចស្រាល់របស់ប្រទេសលោក គឺអ៊ីរ៉ង់។

មេដឹកនាំអ៊ីស្រាអែលចាស់វស្សារូបនេះ ត្រៀមពង្រឹងគោលដៅយុទ្ធសាស្ត្រជាច្រើនរបស់លោក ដែលមានដូចជាការរឹតបន្តឹងការគ្រប់គ្រងយោធា នៅតំបន់ហ្កាហ្សា រារាំងមហិច្ឆតានុយក្លេអ៊ែររបស់អ៊ីរ៉ង់ និងទាញយកផលពីការចុះខ្សោយរបស់សម្ព័ន្ធមិត្តនៃទីក្រុងតេអេរ៉ង់ គឺក្រុមហាម៉ាសប៉ាឡេស្ទីន និងក្រុមហេសបូឡារបស់លីបង់ និងពីការដួលរលំរបស់របបប្រធានាធិបតីស៊ីរី លោក Bashar al-Assad។

ការដួលរលំរបស់លោក Assad ការកម្ចាត់មេដឹកនាំជាន់ខ្ពស់នៃក្រុមហាម៉ាស និងក្រុមហេសបូឡា រួមជាមួយនឹងការបំផ្លាញរចនាសម្ព័ន្ធយោធារបស់ក្រុមទាំងនេះ បង្ហាញពីការទទួលបានជោគជ័យជាបន្តបន្ទាប់ សម្រាប់លោក Netanyahu។ បើគ្មានស៊ីរីទេ សម្ព័ន្ធភាពដែលក្រុងតេអេរ៉ង់បានជួយជ្រោមជ្រែងអស់ជាច្រើនទសវត្សមកហើយនោះ បានបែកខ្ញែកខ្ចាត់ខ្ចាយជាមិនខាន។ នៅពេលដែលឥទ្ធិពលរបស់អ៊ីរ៉ង់ចុះខ្សោយ អ៊ីស្រាអែលកំពុងលេចឡើងជាមហាអំណាចក្នុងតំបន់។

ហើយលោក Netanyahu បានត្រៀមខ្លួនរួចជាស្រេច ក្នុងការបំផ្លាញមហិច្ឆិតានុយក្លេអ៊ែរ និងកម្មវិធីមីស៊ីលរបស់អ៊ីរ៉ង់ ដោយធ្វើការផ្តោតអារម្មណ៍ ដើម្បីកម្ចាត់ និងបញ្ឈប់ការគំរាមកំហែងជាយុទ្ធសាស្ត្រទាំងនេះ ចំពោះប្រទេសអ៊ីស្រាអែល៕