នៅពេលដែលប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump បានជ្រើសរើស «បុគ្គលមានឥទ្ធិពល លោក Elon Musk» ដែលជាអ្នកមានទ្រព្យសម្បត្តិច្រើនជាងគេបំផុតលើពិភពលោក ដើម្បីកាត់បន្ថយការចំណាយ និងភាពខ្ជះខ្ជាយរបស់រដ្ឋាភិបាល លោកគិតថា កិច្ចខិតខំប្រឹងប្រែងនេះ អាចជា «គម្រោង Manhattan នៃពេលវេលារបស់យើង» (Manhattan Project គម្រោងប្រមូលអ្នកខ្លាំងៗស្រាវជ្រាវធ្វើកិច្ចការអ្វីមួយ)។

ត្រឹមថ្ងៃទី១៩ ខែធ្នូ ការទស្សន៍ទាយនោះបានបង្ហាញពីភាពត្រឹមត្រូវ។ ដោយប្រើប្រាស់វេទិកាបណ្ដាញសង្គមដែលលោកបានទិញក្នុងតម្លៃ ៤៤ពាន់លានដុល្លារអាមេរិក ក្នុងឆ្នាំ២០២២ លោក Musk បានបំផ្ទុះគ្រាប់បែកនុយក្លេអ៊ែរផ្នែកវោហារសា្តស្ត្រ អំឡុងដំណើរការការចរចារបិទរដ្ឋាភិបាល នៅវិមាន Capitol Hill។

តាមរយៈការបង្ហោះដាច់ដោយឡែកជាង ១៥០ដង នៅលើបណ្ដាញសង្គម X ដែលចាប់ផ្តើមមុនពេលព្រឹកព្រលឹមថ្ងៃទី១៨ ខែធ្នូ លោក Musk បានទាមទារឲ្យសមាជិកបក្សសាធារណរដ្ឋខ្លួនចេញពីកិច្ចព្រមព្រៀងចំណាយរបស់គណបក្សធំៗទាំង២ ដែលមានបំណងបញ្ចៀសការបិទផ្នែកខ្លះរបស់រដ្ឋាភិបាល នៅថ្ងៃបុណ្យណូអែល។

លោកបានប្តេជ្ញាសងសឹកផ្នែកនយោបាយ ប្រឆាំងនឹងអ្នកណាដែលបោះឆ្នោតគាំទ្រសេចក្ដីស្នើច្បាប់ដ៏ធំនេះ ជាច្បាប់ដែលត្រូវបានគាំទ្រដោយប្រធានសភា លោក Mike Johnson ដែលបានទូរសព្ទទៅលោក Musk កាលពីថ្ងៃទី១៨ ខែធ្នូ ដើម្បីសុំឲ្យលោកបញ្ឈប់ការបង្ហោះអំពីសេចក្ដីស្នើច្បាប់នេះ។

លោក Musk ក៏បានចែករំលែកព័ត៌មានមិនពិត អំពីសេចក្ដីស្នើច្បាប់នេះ ក្នុងនោះរួមទាំងការអះអាងមិនពិតថា វាមានជំនួយថ្មី សម្រាប់អ៊ុយក្រែន ឬមូលនិធិចំនួន ៣ពាន់លានដុល្លារ សម្រាប់កីឡដ្ឋានថ្មី ក្នុងទីក្រុងវ៉ាស៊ីនតោន។ មុនផុតថ្ងៃទី១៨ ខែធ្នូ លោក Trump បានចេញសេចក្តីថ្លែងការណ៍ផ្ទាល់ខ្លួន ដោយហៅសេចក្ដីស្នើច្បាប់នេះ ថា ជាច្បាប់ «ក្បត់ប្រទេសរបស់យើង»។

វាជាពេលវេលាដ៏អស្ចារ្យមួយ សម្រាប់លោក Musk ដែលមិនធ្លាប់ជាប់ឆ្នោតចូលកាន់តំណែង នៅការិយាល័យសាធារណៈ ប៉ុន្តែឥឡូវនេះ ហាក់ដូចជាឧបករណ៍បំពងសំឡេងដ៏ធំបំផុត សម្រាប់បុរសដែលត្រៀមនឹងឡើងគ្រប់គ្រងការិយាល័យ Oval ជាថ្មី៕