អ្នកនាំពាក្យក្រសួងការបរទេស បានប្រាប់ឲ្យដឹងថា អ្នកការទូតជាន់ខ្ពស់របស់រដ្ឋបាល លោក Joe Biden កំពុងស្ថិតនៅក្នុងទីក្រុងដាម៉ាស នាថ្ងៃសុក្រ (ទី២០ ខែធ្នូ) នេះ ដើម្បីជួបជាមួយអាជ្ញាធរស៊ីរីថ្មី ដែលដឹកនាំដោយក្រុម Hayat Tahrir al-Sham (HTS) ដែលជាការជួបផ្ទាល់ និងផ្លូវការលើកដំបូង រវាងទីក្រុងវ៉ាស៊ីនតោន និងមេដឹកនាំជាក់ស្ដែងថ្មីរបស់ប្រទេសស៊ីរី។

អ្នកការទូតជាន់ខ្ពស់របស់ក្រសួងការបរទេស ប្រចាំនៅមជ្ឈិមបូព៌ា គឺលោក Barbara Leaf បេសកជនប្រធានាធិបតីទទួលបន្ទុកកិច្ចការចំណាប់ថ្នូរ លោក Roger Carstens និងទីប្រឹក្សាជាន់ខ្ពស់ដែលទើបតែងតាំងថ្មី លោក Daniel Rubinstein ដែលឥឡូវនេះត្រូវទទួលភារកិច្ចដឹកនាំកិច្ចប្រឹងប្រែងនៅស៊ីរីរបស់ក្រសួង គឺជាអ្នកការទូតអាមេរិកដំបូងគេដែលធ្វើដំណើរទៅកាន់ទីក្រុងដាម៉ាស ចាប់តាំងពីកងជីវពលប្រឆាំងស៊ីរី បានផ្តួលរំលំប្រធានាធិបតីលោក Bashar al-Assad។

ដំណើរទស្សនកិច្ចនេះ ធ្វើឡើងនៅពេលដែលរដ្ឋាភិបាលលោកខាងលិច កំពុងបើកទំនាក់ទំនងការទូតបណ្តើរៗទៅកាន់ក្រុម HTS និងមេដឹកនាំរបស់ក្រុមនេះ គឺលោក Ahmed al-Sharaa ហើយចាប់ផ្តើមជជែកពិភាក្សាថា តើត្រូវដកឈ្មោះភេរវករចេញពីក្រុមនេះដែរ ឬយ៉ាងណា។ ដំណើរទស្សនកិច្ចរបស់គណៈប្រតិភូអាមេរិកធ្វើឡើងក្រោយមានទំនាក់ទំនងជាមួយបារាំង និងអង់គ្លេស ក្នុងរយៈពេលប៉ុន្មានថ្ងៃថ្មីៗនេះ។

អ្នកនាំពាក្យបានប្រាប់ថា នៅក្នុងកិច្ចប្រជុំរបស់ពួកគេ មន្ត្រីសហរដ្ឋអាមេរិក នឹងពិភាក្សាជាមួយអ្នកតំណាងរបស់ក្រុម HTS នូវគោលការណ៍មួយចំនួន ដូចជាការមិនបែងចែកបក្សពួក និងការគោរពសិទ្ធិ ចំពោះជនជាតិភាគតិច ដែលទីក្រុងវ៉ាស៊ីនតោនចង់រួមបញ្ចូល អំឡុងសម័យអន្តរកាលនយោបាយរបស់ប្រទេសស៊ីរី៕