អនុរដ្ឋមន្ត្រីការបរទេសរុស្ស៊ីលោក Sergey Ryabkov បានប្រាប់អ្នកយកព័ត៌មានថា ផែនការរបស់រុស្ស៊ីក្នុងការដោះស្រាយស្ថានការណ៍ជុំវិញអ៊ុយក្រែន គឺផ្អែកលើការពិត និងឆ្លុះបញ្ចាំងពីការប្តេជ្ញាចិត្តមិនផ្លាស់ប្តូររបស់ខ្លួន ដើម្បីការពារផលប្រយោជន៍ស្នូលរបស់ប្រទេសនេះ ។

លោក បាននិយាយថា៖«ប្រសិនបើលោក [បេសកជនពិសេសនៃមេដឹកនាំបន្ទាប់របស់សហរដ្ឋអាមេរិកសម្រាប់អ៊ុយក្រែនលោក Keith] Kellogg នឹងពឹងផ្អែកលើសុភវិនិច្ឆ័យ ក្នុងការស្ថាបនាអនាគតរបស់លោកតាមមធ្យោបាយណាមួយ លោកនឹងគ្រាន់តែត្រូវប្រតិបត្តិការ ក្រោមគំនិតដែលយើងបានស្នើឡើង។ គំនិតទាំងនោះ កើតចេញពីជីវិត កើតចេញពីការពិត ហើយពួកវាឆ្លុះបញ្ចាំងពីការប្ដេជ្ញាចិត្តឥតងាករេរបស់យើង ក្នុងការក្រោកឈរឡើង ដើម្បីផលប្រយោជន៍ស្នូលរបស់យើង រួមទាំងការព្រួយបារម្ភអំពីសុវត្ថិភាពរបស់យើង ដូច្នេះ យើងមិនអាចងាកចេញពីមាគ៌ានេះ បានទេ»។

កាលពីថ្ងៃទី ២៧ ខែវិច្ឆិកា ប្រធានាធិបតីជាប់ឆ្នោតអាមេរិកលោក Donald Trump បានតែងតាំងលោក Kellogg ជាជំនួយការ និងជាបេសកជនពិសេសរបស់សហរដ្ឋអាមេរិកសប្រចាំអ៊ុយក្រែន និងរុស្ស៊ី។ លោកKellogg គាំទ្រឲ្យមានការចរចាដោះស្រាយជម្លោះ នៅអ៊ុយក្រែន។ លោកបានស្នើឲ្យមានការបញ្ចុះបញ្ចូលទីក្រុងមូស្គូ និងទីក្រុងគីវឲ្យបន្តការសន្ទនាឡើងវិញ និងបង្កកខ្សែបន្ទាត់ខាងមុខបច្ចុប្បន្ន។

នាពេលមុននេះ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានដាក់លក្ខខណ្ឌសម្រាប់ដោះស្រាយស្ថានការណ៍ នៅអ៊ុយក្រែន ដែលរួមមានអ៊ុយក្រែនដកទ័ពចេញពីតំបន់ Donbass និង Novorossiya និងការបោះបង់ចោលផែនការចូលរួមជាមួយអង្គការណាតូ។ ទីក្រុងមូស្គូក៏ជឿជាក់ថា រាល់ការដាក់ទណ្ឌកម្មរបស់លោកខាងលិចលើរុស្ស៊ី ត្រូវតែត្រូវបានដកចេញ ហើយស្ថានភាពមិនមែនប្លុក និងមិនមែននុយក្លេអ៊ែររបស់អ៊ុយក្រែន ត្រូវតែត្រូវបានធានា។