ប្រទេសហុងគ្រីបានផ្តល់សិទ្ធិជ្រកកោននយោបាយដល់អតីតអនុរដ្ឋមន្ត្រីយុត្តិធម៌ប៉ូឡូញ លោក Marcin Romanowski ដែលកំពុងស្ថិតនៅក្រោមការស៊ើបអង្កេត នៅឯប្រទេសប៉ូឡូញ ជុំវិញការចោទប្រកាន់ពីបទប្រើប្រាស់មូលនិធិសាធារណៈមិនត្រឹមត្រូវ ដោយការអនុញ្ញាតនេះនាំឲ្យមានប្រតិកម្មខឹងសម្បាពីទីក្រុងវ៉ាសូវី។

នាយអគ្គសេនាធិការរបស់នាយករដ្ឋមន្ត្រីហុងគ្រី លោក Viktor Orban គឺលោក Gergely Gulyas ដែលប្រកាសពីចំណាត់ការនេះ កាលពីល្ងាចថ្ងៃព្រហស្បតិ៍ (ទី១៩ ខែធ្នូ) បានចោទប្រកាន់រដ្ឋាភិបាលប៉ូឡូញថា បានព្យាយាមដាក់សម្ពាធលើគូប្រជែងនយោបាយរបស់ខ្លួន។

ប្រទេសប៉ូឡូញបានហៅការផ្ដល់សិទ្ធិនេះថា ជា «វិធានការអរិភាព» ដែលផ្ទុយនឹងគោលការណ៍នៃកិច្ចសហប្រតិបត្តិការប្រកបដោយភាពស្មោះត្រង់ នៅក្នុងរង្វង់សហភាពអឺរ៉ុប (EU)។ ហើយនៅថ្ងៃសុក្រ (ទី២០ ខែធ្នូ) នេះ ក្រសួងការបរទេសប៉ូឡូញបានឲ្យដឹងថា៖ «ដើម្បីឆ្លើយតបទៅនឹងវិធានការបែបនេះ ឯកអគ្គរដ្ឋទូតហុងគ្រីប្រចាំប្រទេសប៉ូឡូញ នឹងត្រូវបានកោះអញ្ជើញឲ្យទៅកាន់ក្រសួងការបរទេស នៅថ្ងៃនេះ ហើយនឹងទទួលនូវការតវ៉ាជាផ្លូវការ»។

ក្រសួងបានបន្ថែមថា ប្រសិនបើហុងគ្រីបរាជ័យក្នុងការបំពេញកាតព្វកិច្ចអឺរ៉ុបរបស់ខ្លួន ប៉ូឡូញនឹងស្នើឲ្យគណៈកម្មការអឺរ៉ុប ចាប់ផ្តើមដំណើរការនីតិវិធីប្រឆាំងនឹងប្រទេសនេះ។

គួររំលឹកថា រដ្ឋាភិបាលរបស់នាយករដ្ឋមន្ត្រីប៉ូឡូញ លោក Donald Tusk ប្រាប់ថា ខ្លួនបានបើកផ្លូវ ដើម្បីឲ្យរដ្ឋអាជ្ញាស៊ើបអង្កេតការប្រព្រឹត្តខុស ក្រោមការគ្រប់គ្រងនៃរដ្ឋាភិបាលជាតិនិយមរបស់គណបក្សច្បាប់ និងយុត្តិធម៌ (PiS) ដែលអស់អាណត្តិនៅឆ្នាំ២០២៣៕