ជនប៉ាឡេស្ទីន និយាយនៅថ្ងៃសុក្រនេះថា ក្រុមអ្នកតាំងលំនៅនិគមន៍អ៊ីស្រាអែល នាំគ្នាដុតបំផ្លាញព្រះវិហារនៅតំបន់កាន់កាប់វ៉េសប៊ែង ហើយនៅក្នុងរូបភាពវីដេអូឃ្លីបឃើញមានពាក្យ “សងសឹក” “ស្លាប់ទៅក្រុមអារ៉ាប់” និងពាក្យស្លោកត្រូវបានគេបាញ់ទឹកថ្នាំជាភាសាហេព្រើនៅផ្នែកខាងមុខអគារ ។

ស្នាមឆេះរោលខ្មៅ ត្រូវបានមើលឃើញនៅច្រកចូលទីសក្ការៈបូជាដ៏ពិសិដ្ឋមូស្លីមមួយនេះ ស្ថិតក្នុងភូមិ Marda នៅភាគខាងជើងតំបន់វ៉េសប៊ែង ។

អគ្គិភ័យត្រូវបានពន្លត់ មុនពេលវាអាចរីករាលដាលបន្ថែមទៀត ហើយក្រុមនគរបាលអ៊ីស្រាអែល និយាយថា ពួកគេកំពុងប្រមូលភស្តុតាងនៅកន្លែងកើតហេតុ ។

លោក Nasfat al-Khufash គឺជាប្រធានក្រុមប្រឹក្សាភូមិ Marda និយាយថា អ្នកភូមិភ្ញាក់ឡើងឃើញការវាយប្រហារភេរវកម្មជាប្រព័ន្ធដោយក្រុមតាំងលំនៅនិគមន៍ ដែលបានដុតកម្ទេចចោលព្រះវិហារ Bir al-Walideen ។ លោកបន្តថា ការវាយប្រហារទាំងនេះ ដោយក្រុមតាំងលំនៅនិគមន៍ នៅតែបន្ត និងមានលក្ខណៈជាប្រព័ន្ធ ។

នគរបាលអ៊ីស្រាអែល និងសេវាកម្មសន្តិសុខ Shin Bet និយាយនៅក្នុងសេចក្តីថ្លែងការណ៍រួមថា ពួកយើងយល់ឃើញថា ឧបទ្ទេវហេតុនេះ ពិតជាធ្ងន់ធ្ងរខ្លាំងណាស់ ហើយពួកយើងនឹងនាំជនល្មើលមកកាត់ទោសឲ្យស័ក្តិសមនឹងទង្វើរបស់ពួកគេ ។

ដោយឡែក ក្រសួងការបរទេសរបស់អាជ្ញាធរប៉ាឡេស្ទីន បានចាត់ទុកការវាយប្រហារនេះ ថាជាការបំពានចុងក្រោយគេ និងជាឧក្រិដ្ឋកម្មប្រព្រឹត្តដោយក្រុមតាំងលំនៅនិគមន៍អ៊ីស្រាអែល ហើយនិងអំពាវនាវឲ្យក្រុមប្រឹក្សាសន្តិសុខអង្គការសហប្រជាជាតិ ការពារជនប៉ាឡេស្ទីន ៕