នៅទីក្រុង Khan Younis ស្ថិតនៅភាគខាងត្បូងតំបន់ហ្កាហ្សា អ្នកស្រី Makram Hamdouna វ័យ ៥៤ឆ្នាំ បានចំណាយពេលពេញមួយថ្ងៃ ដើម្បីស្វែងរកទឹកឥតឈប់ឈរនៅតាមអគារបាក់បែក ។

អ្នកស្រី Hamdounaដែលជាពលរដ្ឋជម្លៀសខ្លួនចេញពីទីក្រុងហ្កាហ្សា និយាយថា ស្ថានភាពពិតជាអាក្រក់ខ្លាំងណាស់ ជួនកាលគ្មានទឹកនោះទេ ជួនកាលក៏មានទឹក ទឹកពិតជាក្រខ្សត់ខ្លាំងណាស់ ស្ថានភាពទឹកពិតជាអាក្រក់ខ្លាំងណាស់ ។ អ្នកស្រីបន្តថា ទឹកគឺជាជីវិត គ្មានទឹក ជីវិត នឹងត្រូវបានបំផ្លាញ គ្មានជីវិតណាមួយដែលថាគ្មានទឹកនោះទេ ។

ស្ថានភាពកាន់តែជូរចត់ខ្លាំងឡើងសម្រាប់អ្នកស្រី Hamdouna ដែលពេលខ្លះមានទឹកតែ ២ធុងប៉ុណ្ណោះ សម្រាប់ចែកគ្នាជាមួយមនុស្ស ១០នាក់ ។ អ្នកស្រីថា ទឹកតែងតែមិនស្អាតទៀតផង ។

កាលពីថ្ងៃព្រហស្បតិ៍ម្សិលមិញ ក្រុមឃ្លាំមើលសិទ្ធិមនុស្ស បាននិយាយថា អ៊ីស្រាអែល បានសម្លាប់ជនប៉ាឡេស្ទីនរាប់ពាន់នាក់នៅតំបន់ហ្កាហ្សា តាមរយៈមិនផ្តល់ទឹកស្អាតដល់ពួកគេ ដែលសកម្មភាពបែបនេះ រាប់បញ្ចូលថាទង្វើប្រល័យពូជសាសន៍ និងការសម្លាប់រង្គាល ។

ក្រសួងការបរទេសអ៊ីស្រាអែល បានចោទប្រកាន់ក្រុមសិទ្ធិមនុស្សថានិយាយកុហស ហើយនិងនិយាយថា ពួកគេបានសម្របសម្រួលឲ្យមានលំហូរទឹកប្រើប្រាស់ និងជំនួយមនុស្សធម៌ទៅកាន់តំបន់ហ្កាហ្សា ចាប់តាំងពីសង្រ្គាមផ្ទុះឡើង បើទោះបីជាមានការវាយប្រហារឥតឈប់ឈរពីក្រុមហាម៉ាស់ក៏ដោយ ៕