សារព័ត៌មាន New Straits Times (NST) បានរាយការណ៍ថា ប្រទេសម៉ាឡេស៊ីបានកំណត់អត្តសញ្ញាណបណ្ដាញសង្គម និងវេទិកាផ្ញើសារតាមប្រព័ន្ធអ៊ីនធឺណិតចំនួន ៨ ដែលនឹងត្រូវតម្រូវឲ្យសុំអាជ្ញាបណ្ណ នៅឆ្នាំក្រោយ បើទោះបីជារដ្ឋាភិបាលប្រឈមនឹងការប្រឆាំងតវ៉ានឹងផែនការរបស់ខ្លួន ដែលចង់គ្រប់គ្រងលើឧស្សាហកម្មនេះក៏ដោយ។

នៅក្នុងបទសម្ភាសន៍ជាមួយសារព័ត៌មានម៉ាឡេស៊ី រដ្ឋមន្ត្រីទំនាក់ទំនង លោក Fahmi Fadzil បានប្រាប់ឲ្យដឹងថា វេទិកានៃបណ្ដាញសង្គមទាំងនោះ រួមមាន WhatsApp, Facebook និង Instagram របស់ក្រុមហ៊ុន Meta Platforms Inc. បណ្ដាញសង្គម X របស់លោក Elon Musk ឆាណែល YouTube របស់ក្រុមហ៊ុន Google កម្មវិធីផ្ញើសារ Telegram របស់លោក Pavel Durov បណ្ដាញសង្គម WeChat របស់ក្រុមហ៊ុន Tencent Holdings Ltd. និងកម្មវិធីវីដេអូខ្លី TikTok របស់ក្រុមហ៊ុន ByteDance Ltd.។

ចាប់ពីឆ្នាំក្រោយទៅ អ្នកផ្តល់សេវាផ្ញើសារ និងបណ្ដាញសង្គមធំៗដែលដំណើរការដោយគ្មានអាជ្ញាបណ្ណពីរដ្ឋាភិបាល នឹងត្រូវប្រឈមជាមួយវិធានការផ្លូវច្បាប់។ ហើយបើយោងតាមគណៈកម្មការទំនាក់ទំនង និងពហុព័ត៌មានម៉ាឡេស៊ី បានឲ្យដឹងថា ចំណាត់ការនេះ គឺមានគោលបំណងប្រយុទ្ធប្រឆាំងនឹងការកើនឡើងនូវករណីឧក្រិដ្ឋកម្មតាមប្រព័ន្ធអ៊ីនធឺណិត ក្នុងនោះរួមទាំងឆបោក និងល្បែងអនឡាញ ព្រមទាំងការគំរាមកំហែងតាមប្រព័ន្ធអ៊ីនធឺណិត និងឧក្រិដ្ឋកម្មផ្លូវភេទលើកុមារ។

លោករដ្ឋមន្ត្រីត្រូវបានដកស្រង់សម្ដី ដែលបាននិយាយថា វេទិកាមួយចំនួន បានជំទាស់ ដោយលើកឡើងពីហេតុផលនានា ដូចជាការព្រួយបារម្ភពីការរារាំងដល់នវានុវត្តន៍ និងបញ្ហាប្រឈមនៃការបង្កើតការិយាល័យ ក្នុងស្រុក។ តែបើតាមសេចក្ដីរាយការណ៍ បានបង្ហាញថា រដ្ឋាភិបាលកំពុងមានជំហរយ៉ាងដាច់ណាត់ ចំពោះការសម្រេចរបស់ខ្លួន៕