​បាល់ទាត់៖ ​អនាគត​របស់​អ្នក​ចាត់ការ​ក្រុមបាល់ទាត់ Tottenham Hotspur លោក Nuno Espirito Santo កំពុង​ស្ថិត​ក្នុង​មន្ទិលក្រោយ​ដឹកនាំ​បាន​ត្រឹម ១៧​ប្រកួត​បន្ទាប់ពី​ចាញ់ Manchester United ៣-០ កាលពី​ថ្ងៃ​សៅរ៍​ក្នុង​ទឹកដី​ខ្លួនឯង​។

​​ប្រធាន​ក្លិប Spurs លោក Daniel Levy និង​នាយក​បច្ចេកទេស​លោក Fabio Paratici បាន​ជួបប្រជុំគ្នា​ដើម្បី​ពិភាក្សា​ពី​អនាគត​របស់លោក Nuno​។​ ​អតីត​អ្នកចាត់ការ Wolves វ័យ ៤៧ឆ្នាំ​រូបនេះ​បានមក​កាន់តំណែង​កាលពី​ខែមិថុនា​ក្នុង​កិច្ចសន្យា ២ឆ្នាំ​។​ ​Spurs បាន​រង​បរាជ័យ ៥ប្រកួត​ហើយ​ក្នុង​ចំណោម ៧ប្រកួត​ចុងក្រោយ​នៅ English Premier League រដូវ​កាល​នេះ​។​ ​បច្ចុប្បន្នកំពុង​ឈរ​លេខ៨ ក្នុង​តារាង​ដេញ​ពីក្រោយ​ក្រុម​កំពូល​តារាង​តោ​ខៀវ Chelsea ១០ពិន្ទុ​។ ​ទំរង់​លេង​របស់ Spurs បាន​ទទួលរង​ការរិះគន់​ខ្លាំង​នៅពេល​ចាញ់ Manchester United កាលពី​ថ្ងៃ​សៅរ៍​។​

​​ប្រសិនបើ​លោក Nuno Santo ពិតជា​ត្រូវបាន​បណ្តេញចេញ​មែន​នោះ អតីត​អ្នកចាត់ការ Roma លោក Paulo Fonseca ជាថ្មី​ម្តងទៀត​ក្លាយជា​ជំរើស​ទី១ ដែល​អាចមក​កាន់តំណែង​ក្លិប​នៅ​ទីក្រុង​ឡុង​ដ៍​មួយ​នេះ​។ ​យ៉ាងណាក្តី​លោក Fonseca កំពុងស្ថិត​ក្រោម​ការចាប់​អារម្មណ៍​ពី Newcastle ផងដែរ​ដែល​មិនទាន់​រកបាន​អ្នកចាត់ការ​ផ្លូវការ​នៅឡើយ​៕

​អត្ថបទ​៖​នាង សុភា​វុ​ធ