ក្រុមអ្នកការទូតបាននិយាយថា ប្រទេសប្រេស៊ីលរំពឹងថា ប្លុកពាណិជ្ជកម្មអាមេរិកខាងត្បូង ជាប្លុកទីផ្សាររួមប្រទេសអាមេរិកឡាទីន នឹងបង្កើនល្បឿនការចរចាពាណិជ្ជកម្មសេរីបន្ថែមទៀត បន្ទាប់ពីការឈានដល់កិច្ចព្រមព្រៀងមួយជាមួយសហភាពអឺរ៉ុប ខណៈមានការគំរាមកំហែងការដាក់ពន្ធរបស់សហរដ្ឋអាមេរិកនៅពេលដែលលោក Donald Trump ចូលកាន់តំណែងជាប្រធានាធិបតី ដែលបង្ខំឱ្យប្រទេសនានា ធ្វើពិពិធកម្មជម្រើសរបស់ពួកគេសម្រាប់ការនាំចេញ។

អ្នកការទូត បាននិយាយថា នៅខាងលើបញ្ជីនៃកិច្ចព្រមព្រៀងពាណិជ្ជកម្មថ្មីរបស់ប្លុកទីផ្សាររួមប្រទេសអាមេរិកឡាទីន នៅឆ្នាំក្រោយ គឺជាកិច្ចព្រមព្រៀង ជាមួយសមាគមពាណិជ្ជកម្មសេរីអឺរ៉ុបនៃបណ្តាប្រទេសមិនមែនសហភាពអឺរ៉ុបចំនួនបួន និងជាមួយប្រទេសអារ៉ាប់រួម។

អ្នកការទូតម្នាក់បាននិយាយថា ប្រទេសសិង្ហបុរី ក៏បានឈានដល់កិច្ចព្រមព្រៀងជាមួយប្លុកទីផ្សាររួមប្រទេសអាមេរិកឡាទីននៅឆ្នាំនេះ ដូច្នេះប្រទេសនេះអាចត្រូវបានបញ្ជូនទៅប្រធានាធិបតី និងសមាជិកសភារបស់ប្រទេស ដើម្បីធ្វើសច្ចាប័ន។

មន្ត្រីប្រទេសប្រេស៊ីល បាននិយាយថា «នេះពិតជាពេលវេលាដ៏ល្អសម្រាប់ប្លុកទីផ្សាររួមប្រទេសអាមេរិកឡាទីន ដោយពុំមានការសង្ស័យ ដើម្បីឆ្ពោះទៅមុខជាមួយនឹងការចរចាផ្សេងទៀត។ ប្រទេសមួយចំនួន បានខិតមកជិតយើងរួចហើយ ដែលចាប់អារម្មណ៍ក្នុងការពង្រីកការចរចា»។

ប្រសិនបើកិច្ចព្រមព្រៀងលេចចេញជារូបរាង វានឹងបង្ហាញពីការងើបឡើងវិញសម្រាប់ប្លុកពាណិជ្ជកម្ម។ 

ប្លុកទីផ្សាររួមអាមេរិកឡាទីន រួមមានប្រទេសដែលមានសេដ្ឋកិច្ចធំបំផុតចំនួនពីររបស់អាមេរិកខាងត្បូង គឺប្រទេសប្រេស៊ីល និងអាហ្សង់ទីន ប៉ុន្តែបានទទួលរងជាយូរមកហើយពីការខ្វែងគំនិតគ្នាផ្ទៃក្នុង និងការសង្ស័យអំពីប្រសិទ្ធភាពរបស់ខ្លួន។ ប្រទេសអ៊ុយរ៉ាហ្គាយ និងប៉ារ៉ាហ្គាយ ក៏ជាសមាជិកស្ថាបនិកនៃប្លុកទីផ្សាររួមប្រទេសអាមេរិកឡាទីនផងដែរ ខណៈប្រទេសបូលីវី បានចូលរួមនៅក្នុងឆ្នាំនេះ។