ទីបញ្ជាការកណ្តាលរបស់សហរដ្ឋអាមេរិក បានចេញសេចក្តីថ្លែងការណ៍មួយនៅលើវេទិកាបណ្តាញផ្សព្វផ្សាយសង្គម X កាលពីថ្ងៃសុក្រ ទី២០ ខែធ្នូ ដោយប្រកាសថា ការវាយប្រហារតាមអាកាស បានសម្លាប់ប្រតិបត្តិករក្រុមអាយស៊ីស(ISIS) ពីរនាក់ រួមទាំងមេដឹកនាំលោក Abu Yusif ។

យោងតាមការបង្ហោះបានឲ្យដឹងថា ការវាយប្រហារ បានកើតឡើងកាលពីថ្ងៃព្រហស្បតិ៍ ទី១៩ ខែធ្នូ ហើយមេបញ្ជាការនៃទីបញ្ជាការកណ្តាលរបស់សហរដ្ឋអាមេរិក ឧត្តមសេនីយ៍ Michael Erik Kurilla ត្រូវបានគេដកស្រង់សម្តីដោយនិយាយថា ប្រតិបត្តិករ និងមេដឹកនាំក្រុមរដ្ឋឥស្លាម នឹងត្រូវ«ដាក់គោលដៅ ក្នុងការវាយប្រហារ»។

ទីក្រុងវ៉ាស៊ីនតោន ព្រួយបារម្ភថា ក្រុម ISIS អាចដណ្តើមយកឱកាសនេះដើម្បីបង្ហាញខ្លួនជាថ្មី និងចង់បញ្ចៀសការប៉ះទង្គិចណាមួយនៅភាគឦសានរបស់ប្រទេស រវាងក្រុមឧទ្ទាមគាំទ្រដោយប្រទេសទួរគី និងកងជីវពលឃឺដ ដែលជាសម្ព័ន្ធមិត្តរបស់សហរដ្ឋអាមេរិក។

កាលពីដើមខែនេះ ក្រុមអ្នកប្រយុទ្ធស៊ីរី បានផ្តួលរំលំរដ្ឋាភិបាលរបស់លោក Assad និងដណ្តើមកាន់កាប់រដ្ឋធានីដាម៉ាស។

រដ្ឋាភិបាលប្រទេសលោកខាងលិច កំពុងចាប់ផ្តើមបណ្តាញជាបណ្តើរៗចូលទៅកាន់ក្រុម HTS និងមេដឹកនាំរបស់ក្រុមនេះ លោក Ahmed al-Sharaa ដែលជាអតីតមេបញ្ជាការក្រុមអាល់កៃដា នៅក្នុងប្រទេសស៊ីរី ហើយចាប់ផ្តើមការជជែកដេញដោល ថាតើត្រូវដកចេញការចាត់ទុកដែលថា ក្រុមនេះជាក្រុមភេរវករ ឬយ៉ាងណា។