សមាជិកសភារបស់កោះតៃវ៉ាន់ បានប៉ះទង្គិចគ្នាក្នុងជម្លោះដ៏វឹកវរ ជុំវិញច្បាប់ដ៏ចម្រូងចម្រាសជាបន្តបន្ទាប់ កាលពីថ្ងៃសុក្រ ទី២០ ខែធ្នូ។

គណបក្សប្រឆាំងធំ គឺគណបក្ស Kuomintang (KMT) និងសម្ព័ន្ធមិត្តរបស់ខ្លួន បានជំរុញឱ្យមានសេចក្តីស្នើច្បាប់ក្នុងបំណងធ្វើវិសោធនកម្មច្បាប់ជាច្រើន រួមទាំងច្បាប់កាន់តែតឹងរ៉ឹងលើការបណ្តេញមន្ត្រីជាប់ឆ្នោត ចំពោះការចាត់ចែងថវិការបស់រដ្ឋាភិបាល ព្រមទាំងការផ្លាស់ប្តូរតុលាការធម្មនុញ្ញរបស់ខ្លួន។

នៅក្នុងដំណាក់កាលមួយ សមាជិកសភាមកពីគណបក្ស Kuomintang (KMT) បានបិទច្រកទ្វារចូលទៅកាន់សភា ខណៈសមាជិកសភាមកពីគណបក្សប្រជាធិបតេយ្យជឿនលឿន (DPP) ដែលកំពុងកាន់អំណាច បានព្យាយាមប្រឆាំងដើម្បីចូលទៅសភា។

សមាជិកសភាគណបក្សប្រជាធិបតេយ្យជឿនលឿន (DPP) បាននិយាយថា ការធ្វើវិសោធនកម្មតុលាការធម្មនុញ្ញ នឹងធ្វើឱ្យប៉ះពាល់សុក្រិតភាពតាមច្បាប់រដ្ឋធម្មនុញ្ញរបស់កោះតៃវ៉ាន់ ដែលបង្កការលំបាកសម្រាប់ចៅក្រមតុលាការធម្មនុញ្ញ ក្នុងការប្រឈមចំពោះច្បាប់។

ក្រុមអ្នកតវ៉ារាប់ពាន់នាក់ បានមកប្រមូលផ្តុំគ្នានៅខាងក្រៅសភា ដោយអំពាវនាវឱ្យគណបក្សប្រឆាំងលុបចោលច្បាប់ ដែលពួកគេចាត់ទុកថាជាការបំផ្លាញលទ្ធិប្រជាធិបតេយ្យរបស់កោះតៃវ៉ាន់។