អាហ្វហ្គានីស្ថាន៖ ក្រុមតាលីបង់បានអំពាវនាវដល់សហរដ្ឋអាមេរិក និងប្រទេសផ្សេងទៀតកាលពីចុងសប្ដាហ៍នេះ ឲ្យទទួលស្គាល់រដ្ឋាភិបាលរបស់ពួកគេនៅក្នុងប្រទេសអាហ្វហ្គានីស្ថានដោយនិយាយថា ការបរាជ័យក្នុងការទទួលស្គាល់នេះ និងការបន្តបង្កកមូលនិធិបរទេសរបស់អាហ្វហ្គានីស្ថាននឹងនាំឲ្យមានបញ្ហា មិនត្រឹមតែសម្រាប់ប្រទេសនេះប៉ុណ្ណោះទេថែមទាំងសម្រាប់ពិភពលោកទៀតផង។
គ្មានប្រទេសណាមួយបានទទួលស្គាល់រដ្ឋាភិបាលតាលីបង់ជាផ្លូវការនៅឡើយទេ ចាប់តាំងពីក្រុមបះបោរមួយនេះបានកាន់កាប់ប្រទេសកាលពីខែសីហា ខណៈដែលទ្រព្យសម្បត្តិ និងមូលនិធិរាប់ពាន់លានដុល្លារសម្រាប់ប្រទេសអាហ្វហ្គានីស្ថាន នៅក្រៅប្រទេសក៏ត្រូវបានបង្កកផងដែរ បើទោះបីជាប្រទេសនេះប្រឈមនឹងវិបត្តិសេដ្ឋកិច្ច និងមនុស្សធម៌ធ្ងន់ធ្ងរក៏ដោយ។ អ្នកនាំពាក្យក្រុមតាលីបង់លោក Zabihullah Mujahid បានប្រាប់អ្នកសារព័ត៌មានក្នុងសន្និសីទសារព័ត៌មានថា សាររបស់យើងផ្ញើទៅកាន់សហរដ្ឋអាមេរិកគឺ ប្រសិនបើការមិនទទួលស្គាល់នៅតែបន្ត បញ្ហាអាហ្វហ្គានីស្ថាននៅតែបន្តវាគឺជាបញ្ហានៃតំបន់ ហើយអាចក្លាយជាបញ្ហាសម្រាប់ពិភពលោក។ លោកថា មូលហេតុដែលតាលីបង់ និងអាមេរិកកើតសង្គ្រាមកាលពីកន្លងទៅ ក៏ព្រោះតែភាគីទាំងពីរពុំមានទំនាក់ទំនងការទូតជាផ្លូវការ។
សហរដ្ឋអាមេរិកបានឈ្លានពានអាហ្វហ្គានីស្ថានក្នុងឆ្នាំ២០០១ បន្ទាប់ពីការវាយប្រហារថ្ងៃទី១១ ខែកញ្ញាឆ្នាំ២០០១ បន្ទាប់ពីរដ្ឋាភិបាលដឹកនាំដោយក្រុមតាលីបង់នៅពេលនោះ បានបដិសេធមិនប្រគល់មេដឹកនាំក្រុមភេរវករអាល់កៃដាលោក Osama bin Laden ឲ្យទៅសហរដ្ឋអាមេរិក។ រដ្ឋមន្ត្រីការបរទេសចិនលោក Wang Yi បានជួបក្រុមមន្ត្រីតាលីបង់នៅក្នុងប្រទេសកាតាកាលពីសប្ដាហ៍មុន។ លោក Mujahid បាននិយាយកាលពីថ្ងៃសៅរ៍ថា ប្រទេសចិនបានសន្យាផ្ដល់ហេដ្ឋារចនាសម្ព័ន្ធការដឹកជញ្ជូន និងផ្ដល់ការនាំចេញរបស់អាហ្វហ្គានីស្ថានទៅកាន់ទីផ្សាររបស់ចិនតាមរយៈប្រទេសជិតខាងប៉ាគីស្ថាន៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
