ស្វាយរៀង ៖ បណ្ណសមធម៌(ក្រ១និងក្រ២)និងបណ្ណអាហារូបករណ៍សិស្សក្រីក្រ របស់រាជរដ្ឋាភិបាលប្រើប្រាស់លើ ជីវភាព ព្យាបាលជំងឺឥតគិតថ្លៃ និងសិក្សារៀនសូត្រ របស់សិស្សក្រីក្រ ចាប់ពីថ្នាក់ទី១ ដល់ថ្នាក់ទី៦ និងចាប់ពីថ្នាក់ទី៩ ដល់ថ្នាក់ទី១២ ចំនួន១ពាន់ ៧សន្លឹក បន្ថែមទៀតត្រូវបានផ្ដល់ជូនពលរដ្ឋប្រឈមជីវភាពរស់នៅក្នុងភូមិចំនួន១៣របស់ ឃុំក្រោលគោ ស្រុកស្វាយជ្រំ ខេត្តស្វាយរៀង នៅថ្ងៃទី២២ ខែធ្នូ ឆ្នាំ២០២៤នេះ ក្រោយពីបានគណៈកម្មការអន្តរមន្ទីរ និងសាលាឃុំ ធ្វើការវាយតម្លៃនិងចាត់ទុកជាពលរដ្ឋ និងសិស្សក្រីក្រពិតប្រាកដមែន។

លោក ភោគ វណ្ណថន មេឃុំក្រោលគោ បានមានប្រសាសន៍បញ្ជាក់ជូនពលរដ្ឋថា ការដែលរដ្ឋបាលឃុំចែកបណ្ណសមធម៌ក្រីក្រ១ និងក្រ ២ ប្រើប្រាស់លើជីវភាព សេវាសុខាភិបាល និងផ្ដល់ជូនសិស្សក្រីក្រនៅពេលនេះ គឺជាគោលនយោបាយរបស់រាជរដ្ឋាភិបាលក្នុងការលើកកម្ពស់ ជីវភាពសុខមាលភាពរបស់ពលរដ្ឋ និងសិក្សារៀនសូត្ររបស់សិស្ស ហើយការចែកបណ្ណថនេះទៀត ក៏មិនបានប្រកាន់និន្នាការនយោបាយគណបក្សណាមួយនោះទេ។

ឆ្លៀតនាឱកាសនោះដែរក្នុងនាមក្រុមប្រឹក្សាឃុំលោក ភោគ វណ្ណថន បានអំពាវនាវដល់ពលរដ្ឋដែលមកទទួលបណ្ណនៅពេលនេះ ត្រូវខិតខំធ្វើការងារបង្កបង្កើតផល ចឹញ្ចឹមសត្វ ឱ្យបានគ្រប់ក្រុមគ្រួសារ ដើម្បីបំប៉នសុខភាព រក្សាសុខភាព តាមរយៈហូបចុករស់នៅអោយមានបរិស្ថានល្អ ករណីមានជំងឺត្រូវរួសរាន់ទៅប្រឹក្សាជាមួយក្រុមគ្រូពេទ្យ ទទួលយកសេវាព្យាបាល ខណៈដែលបងប្អូន មានបណ្ណ័សមធម៌ប្រើប្រាស់លើសេវាសុខាភិបាល រួចរាល់ហើយ ដើម្បីបញ្ចៀសការស្លាប់មិនបានទទួលយកការសេវាព្យាបាលពីរាជរដ្ឋាភិបាល។

ក្នុងពេលមកទទួលបណ្ណសមធម៌ តំណាងពលរដ្ឋ តំណាងសិស្សក្រីក្រអនុវិទ្យាល័យហ៊ុនសែន ក្រោលគោ បានមានចំណាប់អារម្មណ៍ដោយគោរពថ្លែងអំណរគុណ ចំពោះរាជរដ្ឋាភិបាល សម្ដេចធិបតីហ៊ុន ម៉ាណែត នាយករដ្ឋមន្ត្រី ដែលសម្តេចបានគិតគូរខ្ពស់លើជីវភាពសុខមាលភាព និងការសិក្សារៀនសូត្រ តាមរយៈធ្វើការផ្ដល់បណ្ណសមធម៌ឱ្យពួកគាត់សម្រាប់ប្រើប្រាស់នៅថ្ងៃនេះ។​

សូមបញ្ជាក់ថា អ្នកដែលប្រើប្រាស់បណ្ណដែលរាជរដ្ឋាភិបាលផ្ដល់តាមរយះក្រសួងសង្គមកិច្ចយកមកចែកជូននៅថ្ងៃនេះ គឺជាពលរដ្ឋក្រីក្រ ១ ក្រីក្រ ២ ជនចាស់ជរាចាប់ពីអាយុ៦០ឆ្នាំឡើង កុមារកំព្រា ជនពិការសុខភាពពីកំណើត និងអ្នកដែលមានផ្ទុកមេរោគអេដស៏៕ ដោយ ៖ ភាសារិទ្ធ

                                                                                ​