បារាំង៖ យោង​តាម​ទីក្រុង​ប៉ារីស មេដឹកនាំ​បារាំង និង​អង់គ្លេស​បាន​ព្រមព្រៀងគ្នា​ក្នុង​ការ​បន្ធូរបន្ថយ​ភាព​តានតឹង រយៈពេល​ប៉ុន្មាន​ថ្ងៃ​នៃ​ភាព​ចម្រូងចម្រាស​ជុំវិញ​សិទ្ធិ​នេសាទ​ក្រោយ Brexit ក្នុងការ​បញ្ចៀស​សង្គ្រាម​ពាណិជ្ជកម្ម​ពេញបន្ទុក ដែល​នឹងធ្វើ​ឲ្យ​រង្គោះរង្គើ​នៅ​ទូទាំង​សហភាព​អឺរ៉ុប​។​

​ក្រុមមន្ត្រី​បា​ននិយាយថា លោក​ប្រធានាធិបតី​បារាំង Emmanuel Macron និង​លោកនាយក​រដ្ឋមន្ត្រី​អង់គ្លេស Boris Johnson បាន​ជួបគ្នា​កាលពី​ថ្ងៃអាទិត្យរយៈពេល ​២៥​នាទីនៅក្រៅ​កិច្ចប្រជុំ​កំពូល G20 ក្នុង​ទីក្រុង Rome មួយថ្ងៃ​បន្ទាប់ពី​លោក Johnson បាន​ត្អូញត្អែរ​ប្រាប់​ប្រធាន​សហភាព​អឺរ៉ុបលោកស្រី Ursula von der Leyen ថា បារាំង​គំរាម​សងសឹក​ជុំវិញ​ជម្លោះ​ដ៏​អយុត្តិធម៌​ទាំងស្រុង​នេះ​។​ ​ការិយាល័យ​របស់លោក Macron បាន​បញ្ជាក់ថា មេដឹកនាំ​ទាំង ​២ ​បាន​ព្រមព្រៀង​ធ្វើការ​លើ​វិធានការ​អនុវត្តន៍ និង​កិច្ចសហប្រតិបត្តិការដោះស្រាយ​ជម្លោះក្នុង​រយៈពេល​ប៉ុន្មាន​ថ្ងៃ​ខាងមុខ​។​ ​ប្រភព​ខាងលើ​បន្ថែមថា ប្រទេស​ទាំង​ ២ ត្រូវបាន​រួបរួមគ្នា​លើ​ភាពចាំបាច់​សម្រាប់​ការបន្ធូរបន្ថយ​ភាព​តានតឹង ដោយមាន​ចំណាត់ការ​រ៉ឹង​មាំឲ្យ​បាន​ឆាប់​កាន់តែ​ល្អ​៕

អត្ថបទ៖ សុខមាន