ភ្នំពេញ៖ ឯកឧត្តម ទេព អស្នារិទ្ធ អ្នកនាំពាក្យក្រសួងព័ត៌មាន បានឱ្យដឹងនៅថ្ងៃទី២២ ខែធ្នូ ឆ្នាំ២០២៤នេះថា ដំណើរទស្សនកិច្ចពលរដ្ឋក្នុងតំបន់ប៉ែកឦសាននៃប្រទេសកម្ពុជាបានឈានដល់ទីបញ្ចប់ប្រកបដោយជោគជ័យ ក្រោយត្រូវបានរៀបចំឡើងសរុបទាំងអស់ចំនួន១១លើកនឹងបានជូនប្រជាពលរដ្ឋសរុបចំនួន ២,៤០០ នាក់ (ពីរពាន់បួនរយនាក់) ទៅទស្សនាកម្សាន្តដោយផ្ទាល់នៅតំបន់ក្រវាត់ព្រំដែនកម្ពុជាក្នុងភូមិសាស្ត្រខេត្តត្បូងឃ្មុំ ក្រចេះ ស្ទឹងត្រែង រតនគិរី និងខេត្តមណ្ឌលគិរី។

ឯកឧត្តម ទេព អស្នារិទ្ធ អ្នកនាំពាក្យក្រសួងព័ត៌មាន មានប្រសាសន៍ថា តាងនាមឱ្យថ្នាក់ដឹកនាំ និងក្រុមការងាររៀបចំ ឯកឧត្តមថ្លែងអំណរគុណដល់ប្រជាពលរដ្ឋទាំងអស់មកពីគ្រប់មជ្ឈដ្ឋានដែលបានចំណាយពេលវេលាដ៏មានតម្លៃរបស់ខ្លួនដើម្បីចូលរួមក្នុងដំណើរទស្សនកិច្ច ដែលបានរៀបចំឡើងក្រោមការដឹកនាំ និងសម្របសម្រួលរបស់ក្រសួងព័ត៌មាន និងដោយមានការចូលរួម និងគាំទ្ររៀបចំពីអង្គភាពអ្នកនាំពាក្យរាជរដ្ឋាភិបាល និងរដ្ឋលេខាធិការដ្ឋានទទួលបន្ទុកកិច្ចការព្រំដែន ព្រមទាំងក្រុមការងារស្ម័គ្រចិត្តជាច្រើនរូប ដែលបានខិតខំអស់កំលាំងកាយចិត្តដើម្បីរៀបចំតាំងពីដំណើរទស្សនកិច្ចទី១ រហូតដល់ទី១១ប្រកបដោយជោគជ័យតាមផែនការ និងការផ្តល់សេចក្តីទុកចិត្តពីប្រមុខរាជរដ្ឋាភិបាលកម្ពុជា។

ក្នុងឱកាសេះ ឯកឧត្តម ទេព អស្នារិទ្ធ បានសូមអភ័យទោសពីសំណាក់ប្រជាពលរដ្ឋទាំងអស់ដែលបានចុះឈ្មោះដែរតែពុំបានចូលរួម ព្រោះការរៀបចំ គឺត្រូវបានធ្វើឡើងដោយឈរលើគោលការណ៍ «ចុះឈ្មោះមុនចូលរួមមុន» ហើយត្រូវផ្តោតលើការផ្តល់សុវត្ថិភាពពេញលេញជូនប្រជាពលរដ្ឋដែលចូលរួម ទាំងពេលអញ្ជើញទៅនិងពេលត្រលប់មកផ្ទះវិញ ដើម្បីឱ្យទទួលបាននូវបទពិសោធន៍ល្អ ភាពសប្បាយរីករាយ ឱកាសបង្កើនភាពស្និទស្នាល សាមគ្គីជាគ្រួសារកម្ពុជាតែមួយបន្ថែមទៀត និងផ្តល់ចំណេះដឹងថ្មីៗ ស្តីពីការគ្រប់គ្រងតំបន់ក្រវាត់ព្រំដែននិងការការពារយ៉ាងរឹងមាំនូវអធិបតេយ្យភាព និងបូរណភាពទឹកដីរបស់កម្ពុជាយើង។

ឯកឧត្តម ទេព អស្នារិទ្ធ បន្តថា សកម្មភាពរៀបចំដំណើរទស្សនកិច្ចដែលទទួលបានការសាទរពីព្រះសង្ឃ ប្រជាពលរដ្ឋ និងយុវជនទាំងអស់ដែលបានចូលរួម ហើយត្រូវបានផ្សព្វផ្សាយយ៉ាងទូលំទូលាយទាំងក្នុងនិងក្រៅប្រទេសកម្ពុជា។ ទស្សនកិច្ចនេះត្រូវបានចាត់ទុកជាដំណើរទស្សនកិច្ចកម្រ ព្រោះជាទស្សកិច្ចពលរដ្ឋលើកដំបូងបង្អស់សម្រាប់កម្ពុជា ឬអាចថាក្នុងតំបន់ទាំងមូលក៏ថាបាន ហើយបានក្លាយជាសក្ខីកម្មរស់ដោយប្រជាពលរដ្ឋដ៏សំខាន់ស្តីពីការពិតនិងស្ថានភាពជាក់ស្តែងលើកិច្ចការព្រំដែន ការគ្រប់គ្រងនិងការពារទឹកដីរបស់រាជរដ្ឋាភិបាលកម្ពុជា។ ដំណើរទស្សនកិច្ចពលរដ្ឋនេះបានក្លាយជាទឡ្ហីករណ៍ដ៏សំខាន់ជម្រះអស់មន្ទិលទាំងឡាយជុំវិញការងារព្រំដែន ហើយបញ្ជាក់ពីភាពច្បាស់លាស់ប្រាកដប្រជា និងឆន្ទៈមុះមុតរបស់រាជរដ្ឋាភិបាលកម្ពុជាក្នុងការបន្តបេសកកម្ម ការពារអធិបតេយ្យភាពជាតិ បូរណភាពទឹកដី ព្រមទាំងក្នុងការបន្តធានាសុខសន្តិភាព និងស្ថិរភាពសង្គម-សេដ្ឋកិច្ចសម្រាប់ជាប្រយោជន៍ដល់ជាតិ និងប្រជាជនកម្ពុជាទាំងអស់។

ឯកឧត្តម ទេព អស្នារិទ្ធ បញ្ជាក់ថា សម្រាប់ដំណើរការរៀបចំ ក្រុមការងារបានទទួលការចុះឈ្មោះរបស់ប្រជាពលរដ្ឋសរុបចំនួន ៤,៤០៦ នាក់ ដែលចំនួននេះបានបង្ហាញសន្ទុះមួយដ៏មានសារៈសំខាន់បង្ហាញពីការចូលរួម ក៏ដូចជាទឹកចិត្តស្រលាញ់និងជំនឿទុកចិត្តមកលើរាជរដ្ឋាភិបាលក្នុងការការការពារអធិបតេយ្យភាពបូរណភាពទឹកដីកម្ពុជារបស់យើង ដោយប្រជាពលរដ្ឋពុំជឿឡើយលើការឃោសនាអកុសលអគតិរបស់ក្រុមមួយចំនួនតូចដែលតែងតែប្រើព័ត៌មានបំភ្លៃដោយចេតនាទុច្ចរិតដើម្បីបង្កចលាចលក្នុងសង្គម និងធ្វើឲ្យប្រជាពលរដ្ឋមានការភ័ន្តច្រឡំលើរដ្ឋាភិបាល។

បើតាមការបញ្ជាក់របស់ ឯកឧត្តម ទេព អស្នារិទ្ធ ការចូលរួមរបស់ប្រជាពលរដ្ឋនាពេលនេះ ក៏ដូចជាការចូលរួមក្នុងសកម្មភាពផ្សេងទៀតដែលរដ្ឋាភិបាលបាន និងកំពុងរៀបចំគឺជាការបង្ហាញនូវភាពជឿទុកចិត្តលើការដឹកនាំរបស់រាជរដ្ឋាភិបាល និងភាពជាម្ចាស់ប្រទេស និងបូរណភាពទឹកដី។ ការចូលរួមនេះក៏បានបង្ហាញអំពីសាមគ្គីភាពជាធ្លុងយ៉ាងរឹងមាំទាំងនៅថ្នាក់ជាតិ និងសហគមន៍មូលដ្ឋាន ដល់ប្រជាជាតិនិងសហគមន៍អន្តរជាតិដើម្បីឱ្យបានឃើញថាកម្ពុជាមានការអភិវឌ្ឍផ្នែកសង្គមសេដ្ឋកិច្ច និងជាពិសេសគឺភាពជាម្ចាស់ប្រទេសក្នុងការការពារបូរណភាពទឹកដីដោយមានការចូលរួមពីប្រជាពលរដ្ឋ។ទាំងនេះគឺជាកម្លាំងចលករមួយដ៏សំខាន់ក្នុងការចូលរួមគាំទ្រដើម្បីឲ្យរដ្ឋាភិបាលដឹកនាំការអនុវត្តផែនការនានាសំដៅអភិវឌ្ឍសង្គមសេដ្ឋកិច្ចនិងលើគ្រប់វិស័យក្នុងសង្គម ព្រមទាំងលើកកម្ពស់ជីវភាពរស់របស់ប្រជាជនឱ្យកាន់តែមានការរីកចម្រើនមានភាពសម្បូរណ៍សប្បាយថែមទៀតក្នុងគោលដៅប្រែក្លាយកម្ពុជាឱ្យទៅជាប្រទេសដែលមានប្រាក់ចំណូលខ្ពស់ត្រឹមឆ្នាំ ២០៥០៕