អ៊ីស្រាអែល កាលពីថ្ងៃអាទិត្យ (២២ ធ្នូ) បានបញ្ជាឱ្យបិទ និងជម្លៀសមន្ទីរពេទ្យមួយ ក្នុងចំណោមកន្លែងថែទាំសុខភាពចុងក្រោយដែលនៅដំណើរការមួយផ្នែក ក្នុងតំបន់ឡោមព័ទ្ធនៅជាយភាគខាងជើងនៃតំបន់ហ្កាហ្សាស្ទ្រីប ដោយបង្ខំឱ្យគ្រូពេទ្យត្រូវស្វះស្វែងរកមធ្យោបាយនាំអ្នកជំងឺ និងបុគ្គលិករាប់រយនាក់ទៅកាន់ទីសុវត្ថិភាព ដើម្បីបញ្ចៀសការគំរាមកំហែងដល់អាយុជីវិត។

ប្រធានមន្ទីរពេទ្យ កាម៉ាល់ ធាដវ៉ាន់ (Kamal Adwan) ក្នុងទីក្រុង បេតឡាហ៊ីយ៉ា (Beit Lahiya) លោក ហ៊ូសាម អាប៊ូ សាហ្វីយ៉ា (Husam Abu Safiya) បានប្រាប់សារព័ត៌មានរ៉យទ័រថា ការធ្វើតាមបញ្ជាជម្លៀសនេះគឺ "ស្ទើតែមិនអាចទៅរួចទេ" ដោយសារមិនមានរថយន្តគិលានសង្គ្រោះគ្រប់គ្រាន់ដើម្បីនាំយកអ្នកជំងឺចេញពីទីនោះ។

លោក Safiya និយាយថា "បច្ចុប្បន្នយើងមានជនស៊ីវិលជិត ៤០០នាក់ នៅក្នុងមន្ទីរពេទ្យ រួមទាំងទារកទើបនឹងកើត ដែលជីវិតរបស់ពួកគេពឹងផ្អែកលើអុកស៊ីសែន និងឧបករណ៍កម្ដៅខ្លួន។ យើងមិនអាចជម្លៀសអ្នកជំងឺទាំងនេះដោយសុវត្ថិភាពបានឡើយ ប្រសិនបើមិនមានជំនួយ ឧបករណ៍ និងពេលវេលាគ្រប់គ្រាន់ទេនោះ"។

យោធាអ៊ីស្រាអែល មិនបានឆ្លើយតបនឹងការលើកឡើងរបស់ប្រធានមន្ទីរពេទ្យរូបនេះឡើយ ដោយគ្រាន់តែនិយាយថា កាលពីថ្ងៃសុក្រសប្ដាហ៍មុន ខ្លួនបានបញ្ជូនប្រេងឥន្ធនៈ និងអាហារទៅកាន់មន្ទីរពេទ្យ ហើយបានជួយជម្លៀសអ្នកជំងឺ និងអ្នកថែទាំជាង ១០០នាក់ទៅកាន់មន្ទីរពេទ្យហ្កាហ្សា ផ្សេងទៀត ដោយខ្លះមានការសម្របសម្រួលជាមួយកាកបាទក្រហម ដើម្បីសុវត្ថិភាពផ្ទាល់ខ្លួនរបស់ពួកគេ៕