អ្នកស្ម័គ្រចិត្តរាប់រយនាក់ បានចូកយកប្រេងរាប់តោន ដែលនៅលាយឡំជាមួយដីខ្សាច់ពីឆ្នេរសមុទ្រខ្មៅរបស់រុស្ស៊ី ជាអ្វីដែលប្រធានាធិបតី លោក វ្ល៉ាឌីមៀ ពូទីន បានចាត់ទុកថាជាមហន្តរាយបរិស្ថាន។

ប្រេង បានកំពប់ចេញពីនាវាដឹកប្រេងរបស់រុស្សីដែលមានអាយុកាលចំណាស់ចំនួនពីរគ្រឿង ដែលត្រូវបានធ្វើឲ្យខូចខាតធ្ងន់ធ្ងរដោយសារតែព្យុះ កាលពីចុងសប្តាហ៍នៅច្រកសមុទ្រ Kerch បែងចែក ប្រទេសរុស្ស៊ីភាគខាងត្បូង ពីតំបន់គ្រីម៉េ ដែលទីក្រុងមូស្គូបានភ្ជាប់ឧបសម្ព័ន្ធពីប្រទេសអ៊ុយក្រែនក្នុងឆ្នាំ២០១៤។

អ្នកស្ម័គ្រចិត្តបានប្រាប់សារព័ត៌មានរ៉យទ័រថា មហន្តរាយនេះនឹងមានផលវិបាករយៈពេលវែងដល់ធម្មជាតិនៅតំបន់នេះ ខណៈប្រេងជ្រាបចូលទៅក្នុងស្រទាប់ដី។

ច្រកសមុទ្រ Kerch គឺជាច្រកផ្លូវទឹកសម្រាប់ការនាំចេញគ្រាប់ធញ្ញជាតិ និងផលិតផលឥន្ធនៈរបស់ប្រទេសរុស្ស៊ី។

នាវាពីរគ្រឿង បានដឹកផលិតផលប្រេងប្រហែល ៩.២០០តោន ឬ៦២.០០០បារ៉ែល ដែលក្នុងនោះ ៤០% ត្រូវបានគេប៉ាន់ស្មានថា បានធ្លាយចូលទៅក្នុងសមុទ្រ។

មហន្តរាយនេះ បានកើតឡើងនៅក្នុងតំបន់ដែលផ្តល់ជម្រកដ៏សំខាន់សម្រាប់សត្វសមុទ្រ និងសត្វផ្សោត។ ក្នុងចំណោមទីតាំងដែលរងគ្រោះខ្លាំងជាងគេ គឺ តំបន់Anapa ជារមណីយដ្ឋានទេសចរណ៍ដ៏ពេញនិយម ត្រូវបានគេស្គាល់ថាជាឆ្នេរខ្សាច់ពណ៌មាស។