ប្រធានាធិបតីជាប់ឆ្នោត លោក Donald Trump បានគំរាមកាលពីថ្ងៃអាទិត្យ (២២ ធ្នូ) ថា លោកអាចនឹងដាក់ការគ្រប់គ្រងរបស់សហរដ្ឋអាមេរិក ឡើងវិញលើព្រែកជីកប៉ាណាម៉ា ដោយចោទប្រទេសប៉ាណាម៉ា ថាបានគិតប្រាក់លើសកម្រិតក្នុងការប្រើប្រាស់ផ្លូវទឹកកាត់អាមេរិកកណ្តាលមួយនេះ ដោយទាក់ទាញការស្តីបន្ទោសយ៉ាងខ្លាំងពីប្រធានាធិបតីប៉ាណាម៉ា លោក ហូសេ រ៉ាអ៊ូល មូលីណូ (Jose Raul Mulino)។

ថ្លែងទៅកាន់ហ្វូងអ្នកគាំទ្រនៅរដ្ឋ អារីហ្សូណា (Arizona) លោក Trump ក៏បាននិយាយផងដែរថា លោកនឹងមិនអនុញ្ញាតឱ្យព្រែកជីកនេះធ្លាក់ចូលទៅក្នុង "ដៃមនុស្សខុស" ដោយព្រមានពីលទ្ធភាពនៃឥទ្ធិពលចិន លើផ្លូវទឹកឆ្លងកាត់នោះទេ។

ប្រធានាធិបតីប៉ាណាម៉ា លោក Mulino កាលពីរសៀលថ្ងៃអាទិត្យ បាននិយាយទាំងខឹងសម្បារថា ឯករាជ្យភាពរបស់ប៉ាណាម៉ា គឺមិនអាចចរចារបានទេ ហើយថា ចិនមិនមានឥទ្ធិពលលើការគ្រប់គ្រងព្រែកជីកនោះឡើយ។

គួររម្លឹកថា ព្រែកជីកប៉ាណាមា ត្រូវបានចាប់ផ្ដើមសាងសង់ដោយបារាំងនៅឆ្នាំ១៨៨១ ប៉ុន្តែបរាជ័យនៅឆ្នាំ១៨៩០ ហើយសហរដ្ឋអាមេរិក បានបន្តសាងសង់ដោយជោគជ័យនៅឆ្នាំ១៩០៤-១៩១៤។ អាមេរិក ធ្លាប់បានគ្រប់គ្រងព្រែកជីកនេះជាផ្លូវការនៅឆ្នាំ១៩០៤ រហូតដល់ឆ្នាំ១៩៧៧ នៅពេលមានសន្ធិសញ្ញាប្រគល់ទឹកដីបន្តិចម្តងៗទៅឱ្យប្រទេសប៉ាណាម៉ាវិញ។ បន្ទាប់ពីរយៈពេលនៃការគ្រប់គ្រងរួមគ្នា ប៉ាណាម៉ា បានគ្រប់គ្រងព្រែកជីកនេះពេញលេញនៅឆ្នាំ១៩៩៩៕