សហជីពតំណាងឱ្យបុគ្គលិកហាងកាហ្វេជាង ១០.០០០នាក់ ឈ្មោះ វើកឃើ យូណាយធីត (Workers United) បាននិយាយកាលពីល្ងាចថ្ងៃសៅរ៍ (២១ ធ្នូ) ថា បុគ្គលិកនៅហាងកាហ្វេ ស្តារបាក់ស៍ (Starbuck) ដ៏ល្បីជាច្រើនទីតាំង បានពង្រីកកូដកម្មរបស់ពួកគេទៅទីក្រុងជាច្រើនរបស់សហរដ្ឋអាមេរិក រួមទាំងទីក្រុងញូវយ៉ក ផងដែរ។

សហជីព Workers United បាននិយាយនៅក្នុងសេចក្តីថ្លែងការណ៍មួយថា កូដកម្មរយៈពេលប្រាំថ្ងៃដែលបានចាប់ផ្តើមកាលពីថ្ងៃសុក្រសប្ដាហ៍មុននេះ ហើយដំបូងឡើយបានបិទហាងកាហ្វេ Starbucks នៅទីក្រុង ឡូសអែនជើឡេស (Los Angeles) ឈីកាហ្គោ (Chicago) និង ស៊ីអាថល (Seattle) បានពង្រីកបន្ថែមដល់តំបន់ ញូវជើស៊ី (New Jersey) ញូវយ៉ក (New York) ហ្វីឡាឌែលហ្វៀ (Philadelphia) និង សេន លូអ៊ីស (St. Louis)។

ក្រុមហ៊ុន Starbucks បាននិយាយថា ផលរំខានពីកូដកម្មនេះ មិនមានផលប៉ះពាល់ខ្លាំងដល់ប្រតិបត្តិការរបស់ខ្លួនទេ ដោយសារមានតែហាងមួយចំនួនតូចប៉ុណ្ណោះរបស់សហរដ្ឋអាមេរិក បានរងផលប៉ះពាល់។ គួរបញ្ជាក់ថា Starbucks មានហាងជាង ១១.០០០ទីតាំង នៅសហរដ្ឋអាមេរិក ដោយមានបុគ្គលិកប្រហែល ២០០.០០០នាក់។

កិច្ចពិភាក្សារវាង Starbucks និងសហជីព បានជួបភាពច្របូកច្របល់ជាមួយនឹងបញ្ហាដែលមិនអាចដោះស្រាយបានជុំវិញប្រាក់ឈ្នួល ចំនួនបុគ្គលិក និងកាលវិភាគដ៏មមាញឹក ដែលនាំទៅដល់កូដកម្មនេះ៕