ប្រជាជនភៀសខ្លួនរាប់សែននាក់នៅប្រទេសស៊ូដង់ខាងត្បូង កំពុងស៊ូទ្រាំរស់នៅយ៉ាងវេទនាតាមព្រែកជីកមួយ ដែលក្លាយជាទីជម្រករបស់ពួកគេ បន្ទាប់ពីទឹកជំនន់ដ៏ធ្ងន់ធ្ងរបានវាយប្រហារភូមិរបស់អ្នកស្រុករងគ្រោះទាំងនោះ។

ទឹកជំនន់បែបនេះកំពុងក្លាយជាគ្រោះមហន្តរាយប្រចាំឆ្នាំនៅស៊ូដង់ខាងត្បូង ដែលធនាគារពិភពលោកបានពណ៌នាថាជា "ប្រទេសងាយរងគ្រោះបំផុតក្នុងពិភពលោកចំពោះបម្រែបម្រួលអាកាសធាតុ ហើយក៏ជាប្រទេសមួយដែលខ្វះសមត្ថភាពទប់ទល់បំផុតផងដែរ"។

ទីភ្នាក់ងារមនុស្សធម៌របស់អង្គការសហប្រជាជាតិ បានឱ្យដឹងថា មនុស្សជាង ៣៧៩.០០០នាក់ ត្រូវបានជម្លៀសដោយសារទឹកជំនន់នៅឆ្នាំនេះ។

ស៊ូដង់ខាងត្បូង មានវិស័យហេដ្ឋារចនាសម្ព័ន្ធទន់ខ្សោយបំផុតមួយ។ ដោយទទួលបានឯករាជ្យនៅឆ្នាំ២០១១ ប្រទេសនេះបានធ្លាក់ចូលទៅក្នុងសង្រ្គាមស៊ីវិលក្នុងឆ្នាំ២០១២។ ទោះបីជាមានកិច្ចព្រមព្រៀងសន្តិភាពក្នុងឆ្នាំ២០១៨ក៏ដោយ ក៏រដ្ឋាភិបាលបានបរាជ័យក្នុងការដោះស្រាយវិបត្តិជាច្រើនផ្សេងទៀត។ មនុស្សប្រហែល ២,៤លាននាក់ នៅតែជាជនភៀសខ្លួនខាងក្នុង ដោយសារជម្លោះ និងទឹកជំនន់៕