ក្រុមជំនួយរបស់អង្គការ Oxfam កាលពីថ្ងៃអាទិត្យ (ទី២២ ខែធ្នូ) បាននិយាយថា មានរថយន្តត្រឹមតែ ១២គ្រឿងប៉ុណ្ណោះ ដែលបានដឹកជញជូនអាហារ និងទឹក នៅក្នុងតំបន់ហ្កាហ្សាភាគខាងជើង ក្នុងរយៈពេល ២ខែកន្លះនេះ ដោយបានបង្កើនការជូនដំណឹងអំពីស្ថានភាពមនុស្សធម៌កាន់តែអាក្រក់ទៅៗ នៅក្នុងដែនដីដែលត្រូវបានឡោមព័ទ្ធមួយនេះ។

នៅក្នុងសេចក្តីថ្លែងការណ៍មួយដែលរួមបញ្ចូលការដឹកជញ្ជូនរហូតដល់ថ្ងៃសៅរ៍ចុងសប្ដាហ៍កន្លងមក អង្គការ Oxfam បានឲ្យដឹងថា៖ «ក្នុងចំណោមរថយន្តដឹកទំនិញចំនួន ៣៤គ្រឿងដែលមានអាហារ និងទឹកដែលត្រូវបានអនុញ្ញាតឲ្យចូលទៅក្នុងតំបន់រដ្ឋបាលហ្កាហ្សាភាគខាងជើង ក្នុងរយៈពេល ២ខែកន្លះចុងក្រោយនេះ ការពន្យារពេលដោយចេតនា និងការរារាំងជាប្រព័ន្ធដោយយោធាអ៊ីស្រាអែលមានន័យថា មានរយយន្តតែ ១២គ្រឿងប៉ុណ្ណោះដែលអាចចែកចាយជំនួយដល់ជនស៊ីវិលប៉ាឡេស្ទីនដែលអត់ឃ្លាន»។

គួរបញ្ជាក់ថា អ៊ីស្រាអែល ដែលបានគ្រប់គ្រងយ៉ាងតឹងរ៉ឹង ចំពោះជំនួយចូលទៅក្នុងដែនដីដែលគ្រប់គ្រងដោយក្រុមហាម៉ាស ចាប់តាំងពីសង្រ្គាមផ្ទុះឡើង ជារឿយៗបានស្តីបន្ទោសនូវអ្វីដែលខ្លួននិយាយថា គឺជាការអសមត្ថភាពរបស់អង្គការផ្តល់ជំនួយ ក្នុងការដោះស្រាយ និងចែកចាយជំនួយ ក្នុងបរិមាណដ៏ច្រើន។

នៅក្នុងរបាយការណ៍មួយដែលផ្តោតលើទឹក អង្គការឃ្លាំមើលសិទ្ធិមនុស្សដែលមានមូលដ្ឋាននៅទីក្រុងញូវយ៉ក សហរដ្ឋអាមេរិក កាលពីថ្ងៃព្រហស្បតិ៍សប្ដាហ៍កន្លងមក បានរៀបរាប់លម្អិតអំពីអ្វីដែលខ្លួនហៅថា កិច្ចខិតខំប្រឹងប្រែងដោយចេតនារបស់អាជ្ញាធរអ៊ីស្រាអែល «ក្នុងលក្ខណៈជាប្រព័ន្ធ» ដើម្បីបង្អត់ទឹកអ្នកស្រុកហ្កាហ្សា ដែលទំនងជាបណ្តាលឲ្យមនុស្សរាប់ពាន់នាក់ស្លាប់ ហើយនឹងទំនងជាបន្តបង្កឲ្យមានអ្នកបាត់បង់ជីវិតទៀត»៕