​បារាំង៖ លោក​ប្រធានាធិបតី​បារាំង Emmanuel Macron បាន​និយាយ​ថា លោកនាយក​រដ្ឋមន្ត្រី​អូស្ត្រាលី Scott Morrison បាន​កុហក​លោក ខណៈ​លោក Morrison បាន​កំពុង​លួច​ចរចា​យ៉ាង​សំងាត់ជុំវិញ​កិច្ចព្រមព្រៀង​នាវាមុជទឹកជាមួយ​សហរដ្ឋអាមេរិក និង​ចក្រភព​អង់គ្លេស។​

​ដោយ​ឆ្លើយ​​ទៅ​នឹង​សំណួរ​របស់​អ្នកសារព័ត៌មាន​អំពី​ថា ​តើ​លោក​គិត​ថា លោក Morrison កុហក​រូបលោក​មែន​ទេ លោក Macron បាន​ឆ្លើយ​ថា ខ្ញុំ​មិន​គិត​អញ្ចឹង​ទេ ខ្ញុំ​ដឹង​ហើយ​។ កាលពី​ខែ​មុន ប្រទេស​អូស្ត្រាលី​បាន​លុបចោល​កិច្ចសន្យា​ដែល​មាន​តម្លៃ​រាប់ពាន់​លាន​ដុល្លារ ក្នុង​ការទិញ​នាវា​មុជ​ទឹក​ដំណើរការ​ដោយ​ឥន្ធនៈ​អេឡិចត្រូនិក​របស់​បារាំង ហើយ​ងាក​ទៅ​ទិញ​នាវាមុជទឹក​ដំណើរការ​ដោយ​ថាមពល​នុយក្លេអ៊ែរ​របស់​សហរដ្ឋអាមេរិក​វិញ​។ ការសម្រេចចិត្ត​នេះ​ជា​ផ្នែក​មួយ​នៃ​សន្ធិសញ្ញា Indo-Pacific រវាង​អូស្ត្រាលី ចក្រភព​អង់គ្លេស និង​សហរដ្ឋអាមេរិក​។

​សន្ធិសញ្ញា​ដែល​ត្រូវ​គេ​ស្គាល់​ថា AUKUS បាន​ធ្វើ​ឲ្យ​បារាំង​ខឹងសម្បា ដែល​បាន​ដក​ឯក​អគ្គ​រដ្ឋ​របស់​ខ្លួន​ចេញពី​សហរដ្ឋអាមេរិក និង​អូស្ត្រាលីជុំវិញ​កិច្ចព្រមព្រៀង​ដែល​បាន​បាត់បង់​នេះ​។ លោក Macron លោក Morrison បាន​ពិភាក្សា​គ្នា​កាលពី​ថ្ងៃ​ព្រហស្បតិ៍​ជា​លើក​ដំបូង ​ចាប់​តាំង​ពី​អូស្ត្រាលី​បាន​លុបចោល​កិច្ចសន្យា​ទិញ​នាវាមុជទឹក​របស់​បារាំង។ មេដឹកនាំ​ទាំង​២ បាន​ចូលរួម​នៅ​ក្នុង​ជំនួប​កំពូល​ប្រទេស G20 ក្នុង​ទីក្រុង Rome ប៉ុន្តែ​ពុំ​មាន​រៀបចំ​ជា​ជំនួប​ទ្វេ​ភាគី​ឡើយ​៕

អត្ថបទ៖ សុខមាន