ក្រុមយោធាបានប្រាប់ឲ្យដឹងថា កងកម្លាំងគាំទ្ររហ័ស (RSF) របស់ស៊ូដង់ បានដណ្តើមគ្រប់គ្រងវិញនូវមូលដ្ឋានដឹកជញ្ជូនដ៏សំខាន់មួយ នៅរដ្ឋដាហ្វឺរភាគខាងជើង កាលពីថ្ងៃអាទិត្យ (ទី២២ ខែធ្នូ) ពោលគឺមានរយៈពេលមួយថ្ងៃបន្ទាប់ពីទីតាំងនេះត្រូវបានកាន់កាប់ដោយកងកម្លាំងគូអរិ ដែលចងសម្ព័ន្ធមិត្តជាមួយកងទ័ពស៊ូដង់។

គួរបញ្ជាក់ថា ជម្លោះ រវាងកងកម្លាំង RSF និងកងទ័ព បានផ្ទុះឡើងនៅក្នុងខែមេសា ឆ្នាំ២០២៣ ហើយការប្រយុទ្ធគ្នាដ៏ខ្លាំងក្លាបំផុតមួយចំនួន បានកើតឡើងនៅរដ្ឋដាហ្វឺរភាគខាងជើងនេះ ខណៈដែលកងទ័ព និងកងកម្លាំងរួមសម្ព័ន្ធមិត្ត ជាការប្រមូលផ្ដុំនៃអតីតក្រុមឧទ្ទាម ប្រឹងប្រយុទ្ធគ្នា ដើម្បីបន្តរក្សាទីតាំងចុងក្រោយ នៅតំបន់ដាហ្វឺរឲ្យកាន់តែទូលំទូលាយ។

កងកម្លាំងចម្រុះ និងកងទ័ព បានឲ្យដឹងនៅក្នុងសេចក្តីថ្លែងការណ៍ថា កាលពីថ្ងៃសៅរ៍ ពួកគេបានគ្រប់គ្រងមូលដ្ឋាន al-Zurug ដែលកងកម្លាំង RSF បានប្រើប្រាស់ អំឡុងសង្គ្រាមរយៈពេល ២០ខែ ជាមូលដ្ឋានដឹកជញ្ជូន ដើម្បីបញ្ជូនការផ្គត់ផ្គង់ពីព្រំដែនក្បែរនោះជាមួយប្រទេសឆាដ និងលីប៊ី។

ពួកគេបានប្រាប់បន្ថែមថា ទាហានរបស់កងកម្លាំង RSF រាប់សិបនាក់ ត្រូវបានសម្លាប់ យានយន្តត្រូវបានបំផ្លាញ និងការផ្គត់ផ្គង់ត្រូវបានរឹបអូស នៅពេលពួកគេដណ្តើមបានមូលដ្ឋាននេះ៕