មនុស្ស ៤នាក់ បានស្លាប់នៅតំបន់ភាគនិរតីប្រទេសទួរគី ពេលដែលឧទ្ធម្ភាគចក្រគិលានសង្រ្គោះមួយគ្រឿង បានបុកអគារមន្ទីរពេទ្យ និងបានធ្លាក់លើដី ។

ក្រសួងសុខាភិបាលទួរគី និយាយនៅក្នុងសេចក្តីថ្លែងការណ៍ថា ឧទ្ធម្ភាគចក្រមួយគ្រឿងនេះ បានហោះចេញពីមន្ទីរពេទ្យស្រាវជ្រាវ និងបណ្តុះបណ្តាលក្រុង Mugla ដោយផ្ទុកពីឡុត ២នាក់ វេជ្ជបណ្ឌិតម្នាក់ និងបុគ្គលិកមន្ទីរពេទ្យម្នាក់ ។

អភិបាលក្រុង Mugla លោក Idris Akbiyik បាននិយាយប្រាប់ក្រុមអ្នកសារព័ត៌មានថា ដំបូងឡើយឧទ្ធម្ភាគចក្របានបុកអគារជាន់ទី ៤ មុនពេលធ្លាក់លើដី ។ គ្មាននរណាម្នាក់នៅក្នុងអគារ និងនៅលើដី រងរបួសនោះទេ ។ 

 ដោយឡែក មូលហេតុនៃឧបទ្ទេវហេតុដែលបានកើតឡើងអំឡុងពេលមានអ័ព្ទធ្លាក់ខ្លាំងនេះ កំពុងស្ថិតក្រោមការស៊ើបអង្កេត ។

 រូបភាពវីដេអូឃ្លីបពីកន្លែងកើតហេតុ ឃើញកម្ទេចកម្ទីពីគ្រោះថ្នាក់រាយប៉ាយនៅជុំវិញតំបន់នោះ នៅក្រៅអគារមន្ទីរពេទ្យ ក្នុងនោះ រថយន្តគិលានសង្រ្គោះជាច្រើនគ្រឿង និងក្រុមសង្រ្គោះបន្ទាន់ បាននៅកន្លែងកើតហេតុ ៕