ការរឹតបន្តឹងពាក់ព័ន្ធនឹងអគ្គិភ័យ កំពុងមាននៅទូទាំងរដ្ឋ Victoria របស់ប្រទេសអូស្ត្រាលី ខណៈដែលឧទ្យានជាតិដ៏ពេញនិយមបំផុតមួយរបស់ប្រទេសនេះ ត្រូវបានឆាបឆេះ ហើយមន្ត្រីបានព្រមានអំពីស្ថានភាព «ដ៏មហន្តរាយ» ដែលអាចកើតមានក្នុងតំបន់មួយចំនួន នៅថ្ងៃបុណ្យណូអែល។

នៅក្នុងសន្និសីទទូរទស្សន៍មួយ នារសៀលថ្ងៃចន្ទ (ទី២៣ ខែធ្នូ) នេះ អាជ្ញាធរ បានប្រាប់ថា ចំហេះព្រៃដ៏ធំមួយ នៅជិតឧទ្យានជាតិដ៏ស្រស់ត្រកាល គឺ Grampians National Park ដែលត្រូវចំណាយពេលបើកបរប្រហែល ៣ម៉ោង នៅភាគពាយព្យនៃទីក្រុង Melbourne នៅតែឆាបឆេះមិនអាចគ្រប់គ្រងបាន និងបានបំផ្លាញផ្ទៃដីប្រហែល ៤៣.០០០ហិកតា។ អាកាសធាតុ ក្នុងតំបន់នេះ ត្រូវបានព្យាករថា នឹងឡើងខ្ពស់ នៅប៉ុន្មានថ្ងៃខាងមុខនេះ។

ដោយនិយាយថា សីតុណ្ហភាពនៅភាគខាងជើងរដ្ឋ អាចឡើងខ្ពស់ដល់ ៤២អង្សារសេ រួមជាមួយនឹងកម្លាំងខ្យល់បក់ខ្លាំងរហូតដល់ ១០០គីឡូម៉ែត្រ ក្នុងមួយម៉ោង ស្នងការគ្រប់គ្រងគ្រោះអាសន្នរបស់រដ្ឋ Victoria លោក Rick Nugent បានប្រាប់សន្និសីទសារព័ត៌មានថា៖ «យើងមានលក្ខខណ្ឌអាកាសធាតុដ៏លំបាកមួយចំនួន កាលពីថ្ងៃព្រហស្បតិ៍ និងថ្ងៃសុក្រ»។ 

ឧទ្យាន Grampians គឺជាគោលដៅទេសចរណ៍ដ៏ពេញនិយមមួយ ដែលត្រូវបានគេស្គាល់ដោយសារជាជួរភ្នំដែលមានទេសភាពដ៏ស្រស់ស្អាត និងលាតសន្ធឹងលើតំបន់ Wimmera ដ៏ធំទូលាយ។ បើយោងតាមសេចក្តីថ្លែងការណ៍របស់អាជ្ញាធរអគ្គិភ័យរបស់ប្រទេស នៅថ្ងៃទី២៣ ខែធ្នូនេះ បានឲ្យដឹងថា ការិយាល័យឧតុនិយម ព្យាករពីថ្ងៃមានអគ្គិភ័យ «ដ៏មហន្តរាយ» សម្រាប់តំបន់ នៅថ្ងៃ Boxing Day (ថ្ងៃឈប់សម្រាកក្រោយបុណ្យណូអែល)។

អ្នកស្រុកដែលត្រូវបានជម្លៀសរួចហើយចេញពីទីក្រុងនានា នៅតំបន់នេះ ក្នុងនោះរួមទាំងកន្លែងទេសចរណ៍ Halls Gap ត្រូវបានព្រមានថា ទីនេះនៅតែមិនទាន់មានសុវត្ថិភាព ក្នុងការវិលត្រឡប់ទៅវិញឡើយ។

លោក Nugent បានបន្ថែមថា រដ្ឋ Victoria បានទទួលធនធានបន្ថែមពីរដ្ឋ Tasmania, Queensland និង New South Wales ដែលរួមមានទាំងអ្នកពន្លត់អគ្គិភ័យឯកទេសចំនួន ៨០នាក់ និងយន្តហោះប្រហែល ៧០គ្រឿង ដើម្បីទប់ទល់នឹងចំហេះ នៅឧទ្យានជាតិ Grampians នេះ៕