រថភ្លើងក្រោមដីខ្សែដំបូងរបស់វៀតណាម បានបើកដំណើរការជាផ្លូវការហើយនៅក្នុងទីក្រុងហូឈីមិញ កាលពីថ្ងៃអាទិត្យ ក្រោយពន្យាពេលជាច្រើនឆ្នាំ និងដំណើរថយក្រោយ ។

ផ្លូវរថភ្លើងដែលកសាងភាគច្រើនលើជំនួយហិរញ្ញវត្ថុពីរដ្ឋាភិបាលជប៉ុន ត្រូវបានអនុម័តកាលពីឆ្នាំ ២០០៧ ក្នុងនោះការចាប់ផ្តើមសាងសង់ នៅឆ្នាំ ២០១២ ។

ក្រោយរៀបផែនការរយៈពេល ១៧ឆ្នាំ និងការសាងសង់រយៈពេល ១២ឆ្នាំ នៅទីបញ្ចប់រថភ្លើងក្រោមដី ត្រូវបានបញ្ចប់ដោយចំណាយថវិកាអស់ ១,៧ពាន់លានដុល្លារ ពោលគឺការចំណាយកើនឡើងច្រើនជាងទ្វេដងនៃតម្លៃគម្រោងដំបូងត្រឹម ៦៦៨លានដុល្លារ ។

ពលរដ្ឋនៅក្នុងទីក្រុងហូឈីមិញ ដែលឡើងជិះរថភ្លើងក្រោមដីលើកដំបូង កាលពីថ្ងៃអាទិត្យ មានភាពរំភើបសប្បាយរីករាយជាខ្លាំង ដែលនៅទីបញ្ចប់ខ្សែរថភ្លើងបានបើកដំណើរការ ក្រោយការពន្យាពេលដ៏យូរ ។

លោក Bui Chi Linh គឺជាពលរដ្ឋមួយរូបរស់នៅក្នុងសង្កាត់ Binh Thanh ទីក្រុងហូឈីមីញ បាននិយាយថា ល្បឿនរបស់វាពិតជាលឿនខ្លាំងណាស់ ។ វាពិតជាស្រួលជិះខ្លាំង បើធៀបនឹងរថភ្លើងធម្មតា ។

រដ្ឋាភិបាលវៀតណាម សង្ឃឹមថា ខ្សែរថភ្លើងក្រោមដីនេះ នឹងជំរុញអ្នកបើកបរប្តូរមកប្រើប្រាស់ការដឹកជញ្ជូនសាធារណៈវិញ ដើម្បីជួយកាត់បន្ថយការកកស្ទះចរាចរណ៍ ដែលញាំញីទីក្រុងមួយនេះ ។

ការជិះរថភ្លើងក្រោមដី នឹងឥតគិតថ្លៃអំឡុងខែដំបូងនៃប្រតិបត្តិការ ហើយវៀតណាមគ្រោងនឹងសាងសង់រថភ្លើងក្រោមដី ៦ខ្សែបន្ថែមទៀត នៅក្នុងទីក្រុងហូឈីមិញ ៕