រដ្ឋាភិបាល នៅថ្ងៃចន្ទ (ទី២៣ ខែធ្នូ) បានឲ្យដឹងថា ប្រទេសស្វីសបានអនុម័តកញ្ចប់ទណ្ឌកម្មចុងក្រោយរបស់សហភាពអឺរ៉ុប (EU) លើប្រទេសរុស្ស៊ី និងបេឡារុស។ វិធានការនេះបានកើតឡើងមួយសប្តាហ៍បន្ទាប់ពី EU បានកំណត់គោលដៅលើនាវារបស់ទីក្រុងមូស្គូ និងអង្គភាពនានារបស់ចិន ដែលត្រូវបានរកឃើញថា បានធ្វើពាណិជ្ជកម្មជាមួយយោធារុស្ស៊ី។

រដ្ឋាភិបាលស្វីសបានចុះបញ្ជីបុគ្គលចំនួន ៥៤រូប រួមជាមួយក្រុមហ៊ុន និងអង្គការចំនួន ៣០ស្ថាប័ន ដោយបានបង្កកទ្រព្យសម្បត្តិរបស់ពួកគេ គិតពីថ្ងៃទី២៤ ខែធ្នូ ហើយបានហាមឃាត់នាវាចំនួន ៥២គ្រឿងមិនឲ្យផ្តល់សេវាកម្ម។

សេចក្តីថ្លែងការណ៍របស់រដ្ឋាភិបាលស្វីស បានឲ្យដឹងថា៖ «មាននាវាដឹកប្រេងភាគច្រើន ដែលជាផ្នែកមួយនៃកងនាវាស្រមោលរបស់រុស្ស៊ី ហើយនាវាទាំងនោះកំពុងគេចពីការរឹតបន្តឹងតម្លៃ លើប្រេងឆៅ និងផលិតផលប្រេងរបស់រុស្ស៊ី ឬដឹកជញ្ជូនទំនិញយោធា សម្រាប់ប្រទេសរុស្ស៊ី ឬគ្រាប់ធញ្ញជាតិដែលត្រូវបានលួចពីអ៊ុយក្រែន»។

បុគ្គលដែលត្រូវបានដាក់ទណ្ឌកម្ម នឹងត្រូវហាមឃាត់មិនឲ្យចូលប្រទេសស្វីសឡើយ។ ហើយស្របតាមគោលនយោបាយរបស់ EU ស្វីសក៏បានអនុម័តទណ្ឌកម្មហិរញ្ញវត្ថុ និងការធ្វើដំណើរប្រឆាំងនឹងបុគ្គលចំនួន ២៦រូប និងអង្គការចំនួន២ មកពីប្រទេសបេឡារុសផងដែរ៕