ប្រទេសហ្ស៊កដានី ត្រៀមខ្លួនរួចជាស្រេច ដើម្បីជួយស៊ីរីកសាងប្រទេសឡើងវិញ។ នេះជាសម្ដីរបស់រដ្ឋមន្ត្រីការបរទេសរបស់ប្រទេសនេះ ដែលបាននិយាយបន្ទាប់ពីជួបជាមួយមេដឹកនាំថ្មីរបស់ស៊ីរី លោក Ahmed al-Sharaa ក្នុងទីក្រុងដាម៉ាស នាថ្ងៃចន្ទ (ទី២៣ ខែធ្នូ) នេះ ដោយនេះជាការមានទំនាក់ទំនងកម្រិតខ្ពស់បំផុតរបស់រដ្ឋអារ៉ាប់ជាមួយរដ្ឋបាលដឹកនាំដោយរដ្ឋអ៊ិស្លាមថ្មីរបស់ស៊ីរី។

ដូចគ្នាដែរ អ្នកនាំពាក្យក្រសួងការបរទេសកាតា បានឲ្យដឹងនៅលើបណ្ដាញសង្គម X ថា រដ្ឋមន្ត្រីក្រសួងការបរទេសកាតា លោក Mohammed Al-Khulaifi ក៏បានទៅដល់ទីក្រុងដាម៉ាសដែរ នៅថ្ងៃចន្ទនេះ ដើម្បីធ្វើកិច្ចប្រជុំនានា តាមជើងហោះហើរទី១ របស់ក្រុមហ៊ុនអាកាសចរណ៍ Qatar Airways ដែលបានចុះចតនៅរដ្ឋធានីរបស់ស៊ីរី ចាប់តាំងពីអតីតប្រធានាធិបតី លោក Bashar al-Assad ត្រូវបានទម្លាក់ចេញពីអំណាច។

កិច្ចប្រជុំទាំងនេះ បានពង្រីកទំនាក់ទំនងការទូតបន្ថែមទៀតនៃរដ្ឋបាលថ្មីដែលត្រូវបានបង្កើតឡើង បន្ទាប់ពីក្រុម Hayat Tahrir al-Sham (HTS) របស់ក្រុមលោក Sharaa ដែលជាអតីតមែកធាងរបស់ក្រុមអាល់កៃដា បានដឹកនាំការវាយលុកដ៏សំខាន់របស់ក្រុមឧទ្ទាមដែលបានផ្តួលរំលំលោក Assad ក្រោយមានសង្គ្រាមជាង ១៣ឆ្នាំ។

រូបថតដែលត្រូវបានបង្ហោះនៅលើបណ្ដាញសង្គមដោយក្រសួងការបរទេសហ្ស៊កដានី បានបង្ហាញឲ្យឃើញលោក Sharaa ដែលត្រូវបានគេស្គាល់ផងដែរតាមរយៈឈ្មោះអ្នកធ្វើសង្គ្រាមរបស់លោក គឺ Abu Mohammed al-Golani បានពាក់អាវធំមានក្រវាត់ក អំឡុងពេលជួបជាមួយរដ្ឋមន្ត្រីការបរទេសហ្ស៊កដានី លោក Ayman al-Safadi។

អមដោយការបន្ថែមថា រដ្ឋបាលស៊ីរីថ្មីត្រូវតែមានឱកាស ដើម្បីអភិវឌ្ឍផែនការរបស់ខ្លួននោះ លោក Safadi បាននិយាយបន្ទាប់ពីកិច្ចប្រជុំនោះថា៖ «កិច្ចពិភាក្សារបស់យើង គឺច្បាស់ណាស់ថា យើង នៅក្នុងព្រះរាជាណាចក្រ បានត្រៀមខ្លួនរួចជាស្រេច ដើម្បីផ្តល់ការគាំទ្រ»។ លោក Safadi បានសង្កត់ធ្ងន់ថា៖ «ខ្ញុំបានផ្តោតលើកិច្ចខិតខំប្រឹងប្រែងកសាងប្រទេសឡើងវិញ ហើយហ្ស៊កដានី នឹងផ្តល់ជំនួយ»៕