យោងតាមការកត់សម្គាល់របស់មន្ត្រីអ៊ីស្រាអែល និងប៉ាឡេស្ទីន នៅថ្ងៃចន្ទ (ទី២៣ ខែធ្នូ) នេះ បានឲ្យដឹងថា ការយល់ឃើញមិនស្របគ្នា រវាងអ៊ីស្រាអែល និងក្រុមហាម៉ាស ជុំវិញបទឈប់បាញ់ដែលអាចកើតមាន នៅតំបន់ហ្កាហ្សា បានមានកាន់តែតិចទៅៗ ទោះបីជាការខ្វែងគំនិតគ្នាសំខាន់ៗ មិនទាន់ត្រូវបានដោះស្រាយក៏ដោយ។

ការប៉ុនប៉ងដោយអ្នកសម្រុះសម្រួលអេហ្ស៊ីប កាតា និងសហរដ្ឋអាមេរិក ដើម្បីបញ្ចប់ការប្រយុទ្ធគ្នា និងដោះលែងចំណាប់ថ្នូរអ៊ីស្រាអែល និងបរទេស មានសន្ទុះយ៉ាងខ្លាំងក្លា ក្នុងខែនេះ បើទោះបីជាមិនទាន់មានននូវការទម្លាយភាពទាល់ច្រកណាមួយនៅឡើយក៏ដោយ។

មន្ត្រីប៉ាឡេស្ទីនម្នាក់ដែលស្និទ្ធនឹងការចរចានេះ បានប្រាប់ថា ទោះបីជាចំណុចជាប់គាំងមួយចំនួន ត្រូវបានដោះស្រាយក៏ដោយ ក៏អត្តសញ្ញាណអ្នកទោសប៉ាឡេស្ទីនមួយចំនួនដែលត្រូវដោះលែងដោយអ៊ីស្រាអែល ជាថ្នូរនឹងចំណាប់ថ្នូរ មិនទាន់ត្រូវបានព្រមព្រៀងគ្នានៅឡើយទេ រួមជាមួយនឹងការដាក់ពង្រាយទាហានអ៊ីស្រាអែលយ៉ាងជាក់លាក់ នៅតំបន់ហ្កាហ្សាផងដែរ។

ការលើកឡើងរបស់លោកនេះ ត្រូវគ្នានឹងការអត្ថាធិប្បាយរបស់រដ្ឋមន្ត្រីទទួលបន្ទុកជនភៀសខ្លួនអ៊ីស្រាអែល លោក Amichai Chikli ដែលបាននិយាយថា បញ្ហាទាំង២ នៅតែស្ថិតក្នុងដំណើរការចរចា។ យ៉ាងណាក៏ដោយ លោកបានបញ្ជាក់ថា ភាគីទាំង២ ខិតទៅជិតការសម្រេចបាននូវកិច្ចព្រមព្រៀងជាងពេលណាៗទាំងអស់ ក្នុងរយៈពេលជាច្រើនខែមកនេះ។

គួរបញ្ជាក់ថា រយៈពេលនៃបទឈប់បាញ់ គឺជាចំណុចជាប់គាំងសំខាន់ នៅក្នុងដំណើរការចរចាមិនជោគជ័យជាច្រើនជុំ។ ក្រុមហាម៉ាសចង់បញ្ចប់សង្គ្រាមតែម្ដង ខណៈដែលអ៊ីស្រាអែលចង់បញ្ចប់ការគ្រប់គ្រងរបស់ក្រុមហាម៉ាស នៅតំបន់ហ្កាហ្សាជាមុនសិន៕