ថៃ៖ នៅថ្ងៃចន្ទនេះ ប្រទេសថៃបានបើកស្វាគមន៍ភ្ញៀវទេសចរបរទេស រយៈពេលប្រហែល១ឆ្នាំកន្លះ ក្រោយបិទព្រំដែនរបស់ខ្លួន ដើម្បីប្រយុទ្ធប្រឆាំងនឹងជំងឺ COVID-19 ដែលការបើកព្រំដែនឡើងវិញនេះ ធ្វើឲ្យមានក្តីសង្ឃឹមចំពោះការងើបសេដ្ឋកិច្ច នៅក្នុងប្រទេសដែលពឹងផ្អែកច្រើនលើការចំណាយរបស់ភ្ញៀវបរទេស។
លំហូរអ្នកដំណើរ បានឆ្លងកាត់កន្លែងដែលធ្លាប់គេបោះបង់ចោលកាលពីមុននៅក្នុងអាកាសយានដ្ឋានអន្តរជាតិក្រុងបាងកក។
ភ្ញៀវទេសចរដែលចាក់វ៉ាក់សាំងបង្ការជំងឺ COVID-19ពេញដូស មកពី ៦៣ប្រទេស និងដែនដី អាចធ្វើដំណើរមកកាន់ប្រទេសថៃបាន។ ពួកគ នឹងត្រូវធ្វើតេស្តពេលមកដល់ រួចចំណាយពេល១យប់នៅក្នុងសណ្ឋាគារដែលបានកំណត់ ដើម្បីរង់ចាំលទ្ធផល។
បើសិនជាការធ្វើតេស្តរបស់ពួកគេអវិជ្ជមាន ពួកគេនឹងអាចដើរហើរដោយសេរី និងស្នាក់តាមចិត្តនៅក្នុងប្រទេសថៃ។ លោក ប្រ៊ូស ស្ទីឡេស គឺជាភ្ញៀវមកពីចក្រភពអង់គ្លេស ដែលទើបចុះពីជើងហោះហើររបស់លោកចេញពីទីក្រុងឡុងដ៍។ លោកបាននិយាយថា វាគ្មានបញ្ហានោះទេ វាដំណើរការទៅយ៉ាងរលូត។ ពួកយើងដឹងច្បាស់ថា យើងត្រូវការចំណាយពេលមួយរយៈ ដើម្បីឆ្លងកាត់ព្រំដែន ពេលមកដល់។
ទោះបីជាយ៉ាងណាក៏ដោយ ភ្ញៀវដែលមកពីប្រទេសក្រៅបញ្ជី ៦៣ប្រទេស និងដែនដី អាចចូលប្រទេសថៃបាន តែពួកគេត្រូវដាក់ឲ្យនៅដាច់ដោយឡែករយៈពេលយូរ ពេលមកដល់ ហើយនិងត្រូវធ្វើតេស្តញឹកញាប់ដើម្បីរកជំងឺ COVID-19។
យោងតាមការអះអាង របស់អ្នកចាត់ការទូទៅអាកាសយានដ្ឋានអន្តរជាតិក្រុងបាងកក បានឲ្យដឹងថា ភ្ញៀវប្រហែល ២.៣០០នាក់ នឹងមកដល់តាមជើងហោះហើរអន្តរជាតិនាថ្ងៃចន្ទនេះ៕ អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
