មនុស្សរាប់ពាន់នាក់ បានចូលរួមក្នុងបាតុកម្មប្រឆាំងរដ្ឋាភិបាលនៅក្នុងរដ្ឋធានី Bratislava របស់ប្រទេសស្លូវ៉ាគី កាលពីថ្ងៃចន្ទ ទី២៣ ខែធ្នូ បន្ទាប់ពីមានជំនួបដ៏គួរឱ្យភ្ញាក់ផ្អើលមួយរបស់នាយករដ្ឋមន្រ្តីប្រទេសស្លូវ៉ាគី លោក Robert Fico ជាមួយប្រធានាធិបតីរុស្ស៊ី លោក Vladimir Putin នៅទីក្រុងមូស្គូ។

ដោយហៅ លោក Fico ថាជា «ជនក្បត់ជាតិ» និងកាន់ស្លាកតវ៉ាអំណានថា «នេះពុំមែនជានាយករដ្ឋមន្ត្រីរបស់ខ្ញុំទេ» អ្នកតវ៉ាមួយចំនួន បាននិយាយថា ពួកគេមានការភ្ញាក់ផ្អើលចំពោះដំណើរទស្សនកិច្ចនេះ ដោយស្ត្រីម្នាក់និយាយថា នាងមិនពេញចិត្តដែលនាយករដ្ឋមន្ត្រីរបស់នាងនិយាយទៅកាន់ «ឃាតកសម្លាប់ប្រជាជនស្លូតត្រង់»។

អតីតនាយករដ្ឋមន្ត្រីស្លូវ៉ាគី លោក Eduard Heger បាននិយាយក្នុងអំឡុងការតវ៉ាថា វាអាស្រ័យលើក្រុមបាតុករ ដើម្បីធានាបានថា ប្រទេសស្លូវ៉ាគី មិនមានរូបភាពអាក្រក់ដូចរដ្ឋាភិបាលស្លូវ៉ាគី នេះទេ។

លោក Fico បានជួបជាមួយលោកPutin កាលពីថ្ងៃអាទិត្យ ទី២២ ខែធ្នូ ជាដំណើរទស្សនកិច្ចដ៏កម្ររបស់មេដឹកនាំសហភាពអឺរ៉ុប ទៅកាន់ទីក្រុងមូស្គូ ខណៈកិច្ចសន្យាដែលអនុញ្ញាតឱ្យឧស្ម័នរុស្ស៊ី ឆ្លងកាត់ប្រទេសអ៊ុយក្រែន ជិតដល់ពេលផុតកំណត់។

ប្រទេសស្លូវ៉ាគី ពឹងផ្អែកលើឧស្ម័នដែលឆ្លងកាត់ប្រទេសជិតខាងអ៊ុយក្រែន ហើយប្រទេសនេះបានបង្កើនកិច្ចខិតខំប្រឹងប្រែងដើម្បីរក្សាលំហូរទាំងនោះចាប់ពីឆ្នាំ២០២៥ ខណៈកំពុងរិះគន់ប្រធានាធិបតីអ៊ុយក្រែន លោក Volodymyr Zelenskiy ចំពោះការបដិសេធ មិនបន្តកិច្ចសន្យាដែលនឹងផុតកំណត់នៅចុងឆ្នាំនេះ។