មេដឹកនាំប្រទេសស៊ីរី លោក Ahmed al-Sharaa បាននិយាយបន្ទាប់ពីជួបជាមួយមន្ត្រីជាន់ខ្ពស់ប្រទេសកាតា នៅទីក្រុងដាម៉ាសកាលពីថ្ងៃចន្ទ ទី២៣ ខែធ្នូ ថា ប្រទេសកាតា បានត្រៀមលក្ខណៈក្នុងការវិនិយោគលើវិស័យថាមពល និងកំពង់ផែរបស់ប្រទេសស៊ីរី ខណៈរដ្ឋបាលថ្មីរបស់លោក បានពង្រីកទំនាក់ទំនងជាមួយបណ្តារដ្ឋអារ៉ាប់។

លោក Sharaa ក៏បានទទួលរដ្ឋមន្ត្រីការបរទេសហ្ស៊កដានី លោក Ayman al-Safadi ជារដ្ឋមន្ត្រីការបរទេសអារ៉ាប់ដំបូងគេ ដែលបានមកធ្វើទស្សនកិច្ចនៅទីក្រុងដាម៉ាស ចាប់តាំងពីក្រុម Hayat Tahrir al-Sham (HTS) បានផ្តួលរំលំ លោក Bashar al-Assad កាលពីពីរសប្តាហ៍មុន។

លោក Safadi បាននិយាយថា ប្រទេសហ្ស៊កដានី បានត្រៀមរួចជាស្រេចដើម្បីជួយស្តារប្រទេសស៊ីរីឡើងវិញ។

ជំនួបនេះ បានពង្រីកទំនាក់ទំនងផ្នែកការទូតបន្ថែមទៀតនៃរដ្ឋបាលថ្មី ដែលត្រូវបានបង្កើតឡើងបន្ទាប់ពីក្រុម HTS របស់លោក Sharaa ជាអតីតសាខារបស់ក្រុមអាល់កៃដា បានដឹកនាំការវាយលុករបស់ក្រុមឧទ្ទាម ផ្តួលរំលំលោក Assad បន្ទាប់ពីសង្គ្រាមរយៈពេលជាង១៣ឆ្នាំ។

រដ្ឋមន្ត្រីការបរទេសកាតា លោក Mohammed Al-Khulaifi បានជិះយន្តហោះទៅកាន់ទីក្រុង ដាម៉ាស កាលពីថ្ងៃចន្ទ តាមជើងហោះហើរ Qatar Airways ជាលើកដំបូង ចាប់តាំងពីលោក Assad ត្រូវបានផ្តួលរំលំ។

លោក Sharaa និយាយថា ភាគីប្រទេសកាតា បានបង្ហាញពីការត្រៀមខ្លួន សម្រាប់ការវិនិយោគយ៉ាងទូលំទូលាយនៅក្នុងប្រទេសស៊ីរីក្នុងវិស័យជាច្រើន ដែលក្នុងចំណោមនេះ មានទាំងវិស័យថាមពល ដែលពួកគេមានបទពិសោធន៍ដ៏អស្ចារ្យ និងស្តារឡើងវិញកំពង់ផែ និងអាកាសយានដ្ឋាន។