យោធាអ៊ីស្រាអែល បានបន្តប្រតិបត្តិការសឹកយ៉ាងបង្ហូរឈាមរបស់ខ្លួនលើដែនដីហ្កាហ្សា កាលពីថ្ងៃចន្ទ (២៣ ធ្នូ) ស្របពេលមានរបាយការណ៍បង្ហាញពីសន្ទុះវឌ្ឍនភាពគួរឱ្យកត់សម្គាល់ក្នុងកិច្ចចរចាបទឈប់បាញ់ដែលពិភពលោកទន្ទឹងរង់ចាំ។

ក្រសួងសុខាភិបាលហ្កាហ្សា បានរាយការណ៍ថា សកម្មភាពយោធាអ៊ីស្រាអែល បណ្តាលឱ្យមានការសម្លាប់រង្គាលចំនួន ៥លើកក្នុងពេល ២៤ ម៉ោងកន្លងទៅនោះ ដោយមនុស្ស ៥៨ នាក់ស្លាប់ និង ៨៦នាក់រងរបួស។ ចំនួនអ្នកស្លាប់ពីការវាយលុករបស់អ៊ីស្រាអែល គិតត្រឹមថ្ងៃចន្ទ ២៣ ធ្នូ បានឡើងដល់ ៤៥.៣១៧នាក់ និងជាង ១០៧.០០០នាក់របួស ចាប់តាំងពីថ្ងៃទី០៧ ខែតុលា ឆ្នាំ២០២៣ មក។៊

កាសែតអ៊ីស្រាអែល Haaretz បានរាយការណ៍ថា ប្រហែល ៧០% នៃលំនៅឋាន និងអគារនៅក្នុងជំរំ Jabalia ភាគខាងជើងហ្កាហ្សា ត្រូវបានបំផ្លាញប្រែក្លាយជាអ្វីដែលពួកគេពិពណ៌នាថាជា "វាលរហោឋាន"។ ដោយធ្លាប់ជាតំបន់ដែលមានប្រជាជនរស់នៅច្រើនជាងគេបំផុតក្នុងពិភពលោក ពេលនេះជំរំ Jabalia ត្រូវបានទុកចោលក្នុងគំនរបាក់បែក។

នៅលើសមរភូមិ កងពលតូច Al-Qassam របស់ក្រុមហាម៉ាស រាយការណ៍ថា ពួកគេបានកំណត់គោលដៅលើកងកម្លាំងអ៊ីស្រាអែល នៅខាងក្នុងអគារមួយជិតផ្លូវប្រសព្វ Abu Sharkh ភាគខាងជើងហ្កាហ្សា ដោយបានសម្លាប់ទាហានអ៊ីស្រាអែលជាច្រើននាក់ និងបានរំដោះជនជាតិប៉ាឡេស្ទីនមួយចំនួនដែលឃុំខ្លួននៅខាងក្នុងអគារនោះ៕