លោកនាយករដ្ឋមន្ត្រីអ៊ីស្រាអែល Benjamin Netanyahu ត្រូវបានចោទប្រកាន់ពីបទបំផ្លិចបំផ្លាញការចរចាបទឈប់បាញ់នៅដែនដីហ្កាហ្សា បន្ទាប់ពីលោកបានទទូចម្តងទៀតពីចេតនាចង់បន្តសង្រ្គាម រហូតកម្ទេចក្រុមហាម៉ាសទាំងស្រុងពីទឹកដីនេះ។

ពាក្យចចាមអារ៉ាមជុំវិញបទឈប់បាញ់ជិតសម្រេចបាន បានផ្សព្វផ្សាយជាថ្មីម្តងទៀតក្នុងប៉ុន្មានសប្តាហ៍ថ្មីៗនេះ ដោយទាំងក្រុមហាម៉ាស និងមន្ត្រីអ៊ីស្រាអែល សុទ្ធតែបានអះអាងថា ពួកគេកាន់តែខិតជិតដល់កិច្ចព្រមព្រៀង ដែលនឹងបញ្ចប់ជម្លោះជាង១ឆ្នាំ ដោះលែងចំណាប់ខ្មាំងអ៊ីស្រាអែល និងដោះលែងអ្នកទោសប៉ាឡេស្ទីនរាប់រយនាក់។

ទោះយ៉ាងណាក៏ដោយ នាយករដ្ឋមន្ត្រីអ៊ីស្រាអែលរូបនេះ បានប្រាប់សារព័ត៌មាន The Wall Street Journal ថាលោកនឹងមិនយល់ព្រមបញ្ចប់សង្គ្រាម មុនពេលកម្ចាត់ក្រុមហាម៉ាសអស់ពីដែនដីហ្កាហ្សា នោះទេ។ លោកនឹងមិនទុកពួកគេឱ្យកាន់អំណាចនៅហ្កាហ្សាចម្ងាយត្រឹមតែ៣០ម៉ាយល៍ពីទីក្រុង Tel Aviv ឡើយ។ បទឈប់បាញ់នឹងមិនកើតឡើងទេ។

លោក Yair Lapid មេដឹកនាំបក្សប្រឆាំងរបស់អ៊ីស្រាអែល បានប្រាប់វិទ្យុ Army កាលពីថ្ងៃចន្ទដើមសប្ដាហ៍នេះថាលោក Netanyahu មិនចង់បានកិច្ចព្រមព្រៀង ដោយសារតែនយោបាយរបស់លោក។

លោក Netanyahu កំពុងលេងល្បិចដដែល ដែលលោកធ្លាប់បានប្រើកាលពីមុនមក។ ការចរចាកំពុងរីកចម្រើន និងអាចកើតឡើងបាន ហើយបន្ទាប់មកលោកនឹងប្រាប់ប្រព័ន្ធផ្សព្វផ្សាយបរទេស រួចពន្យល់ថាលោកនឹងមិនបញ្ឈប់សង្គ្រាមឡើយ ហើយផ្តល់សញ្ញាដល់ក្រុមហាម៉ាសថាគ្មានហេតុផលត្រូវមានកិច្ចព្រមព្រៀងជាមួយលោកជាដាច់ខាត។

លោក បេននីហ្គែនស៍ (Benny Gantz) អតីតរដ្ឋមន្ត្រីគណៈរដ្ឋមន្ត្រីសង្រ្គាម និងជាមេដឹកនាំបក្សបង្រួបបង្រួមជាតិ បានរិះគន់លោក Netanyahu ចំពោះការរាយការណ៍ទៅកាន់ប្រព័ន្ធផ្សព្វផ្សាយព័ត៌មានបរទេស និងបំផ្លាញដំណើរការចរចាបទឈប់ដែលកំពុងបន្ត និងមានភាពផុយស្រួយបំផុត៕