តុលាការធម្មនុញ្ញកូរ៉េខាងត្បូង បាននិយាយកាលពីថ្ងៃចន្ទ (២៣ ធ្នូ) ថាខ្លួននឹងបើកសវនាការតាមនីតិវិធីនៅថ្ងៃទី២៧ ខែធ្នូ តាមការគ្រោងទុក បើទោះបីជាប្រធានាធិបតី Yoon Suk Yeol នៅតែបន្តបដិសេធការបង្ហាញខ្លួន និងមិនទទួលយកដីការបស់តុលាការក៏ដោយ។

តុលាការ ដែលត្រូវចេញសេចក្តីសម្រេចចុងក្រោយលើការចោទប្រកាន់ទម្លាក់តំណែងរបស់លោកក្នុងរយៈពេល ១៨០ថ្ងៃ បាននិយាយថា ចៅក្រមទាំង ៦រូបបានសម្រេចចាត់ទុកថា លោក Yoon បានទទួលសំណើបង្ហាញខ្លួនជាលាយលក្ខណ៍អក្សរកាលពីថ្ងៃទី២០ ខែធ្នូ រួចហើយ។

អ្នកនាំពាក្យតុលាការ បាននិយាយកាលពីថ្ងៃចន្ទថា "ដោយផ្អែកលើនីតិវិធីរដ្ឋប្បវេណីមាត្រា១៨៧ និងនីតិវិធីព្រហ្មទណ្ឌមាត្រា៦១ ប្រការ២ សំណើជាលាយលក្ខណ៍អក្សរអាចត្រូវចាត់ទុកថា "បានទទួល" នៅពេលឯកសារទាំងនោះទៅដល់អាសយដ្ឋានរបស់អ្នកទទួល ដោយមិនគិតពីការទទួលយក ឬការបដិសេធនោះទេ"។

តុលាការបន្ថែមថា ខ្លួនបានបញ្ជូនឯកសារចំនួនបី ដោយទីមួយគឺការជូនដំណឹងពីចុះឈ្មោះសវនាការ ទីពីរសេចក្តីជូនដំណឹងថ្ងៃបើកសវនាការ ជាមួយសំណើបង្ហាញខ្លួននៅតុលាការតាមកាលបរិច្ឆេទកំណត់ ហើយឯកសារចុងក្រោយ គឺជាដីការបស់តុលាការ ដើម្បីឱ្យគាត់រៀបចំសេចក្តីថ្លែងការណ៍ និងប្រគល់ភស្តុតាង ដូចជាកំណត់ហេតុកិច្ចប្រជុំគណៈរដ្ឋមន្ត្រីជាដើម។

ថ្ងៃផុតកំណត់សម្រាប់លោកក្នុងការបញ្ជូនឯកសារបែបនេះគឺថ្ងៃអង្គារ (២៤ ធ្នូ) នេះ។ ទោះបីលោក Yoon ទទួលបានឯកសារឬអត់ក៏ដោយ តុលាការនិយាយថានឹងបន្តទៅមុខនៅថ្ងៃទី២៧ ខែធ្នូ សម្រាប់សវនាការត្រៀមខ្លួនជាលើកដំបូង៕