ទិន្នន័យផ្លូវការបានបង្ហាញនៅថ្ងៃអង្គារ (២៤ ធ្នូ) នេះថា កូរ៉េខាងត្បូង បានក្លាយទៅជា "សង្គមវ័យចំណាស់ខ្លាំង" ជាមួយនឹងតួលេខ ២០% ឬ ១០លាននាក់ នៃចំនួនប្រជាជនសរុបជាង ៥១លាននាក់របស់ខ្លួនមានអាយុ ៦៥ឆ្នាំ ឬចាស់ជាងនេះ ដែលជានិន្នាការអាប់អួរ ជំរុញដោយអត្រាកំណើតទាបដ៏គួរឱ្យព្រួយបារម្ភ។

សេដ្ឋកិច្ចធំបំផុតទីបួនរបស់អាស៊ីមួយនេះ បានកត់ត្រាត្រឹមតែ ០,៧ នៃអត្រាកំណើតសម្រាប់ស្ត្រីកាលពីចុងឆ្នាំមុន ដែលជាតួលេខទាបបំផុតមួយនៅក្នុងពិភពលោក និងទាបជាងអត្រាជំនួស ២,១ ដែលត្រូវការដើម្បីទ្រទ្រង់ចំនួនប្រជាជនបច្ចុប្បន្ន។

នេះមានន័យថាចំនួនប្រជាជនកូរ៉េខាងត្បូង មានវ័យចំណាស់ និងកាន់តែថយចុះយ៉ាងឆាប់រហ័ស ហើយក៏មានន័យថា ចំនួនមនុស្សចាស់បានកើនឡើងទ្វេដងចាប់តាំងពីឆ្នាំ២០០៨ នៅពេលដែលតួលេខតិចជាង ៥លាននាក់ជាមនុស្សចាស់។

រដ្ឋាភិបាលបានចំណាយប្រាក់រាប់ពាន់លានដុល្លារទៅក្នុងការលើកទឹកចិត្តឱ្យយកកូនបន្ថែមទៀត ដោយអាជ្ញាធរក្រុងសេអ៊ូល ផ្តល់ប្រាក់ឧបត្ថម្ភសម្រាប់ការបង្កកស៊ុតក្នុងកិច្ចប្រឹងប្រែងមួយនាពេលថ្មីៗនេះ។ ទោះជាយ៉ាងនេះក្ដី ការខិតខំបែបនេះបរាជ័យដោយមិនបានផ្តល់នូវលទ្ធផលដូចគ្រោងទុក ហើយចំនួនប្រជាជនត្រូវបានគេព្យាករណ៍ថា នឹងធ្លាក់ចុះដល់ ៣៩លាននាក់នៅឆ្នាំ២០៦៧ នៅពេលដែលអាយុប្រជាជនជាមធ្យមនឹងនៅកម្រិត ៦២ឆ្នាំ៕