ធនាគារពិភពលោក នៅថ្ងៃអង្គារ (ទី២៤ ខែធ្នូ) នេះ បានប្រកាសផ្ដល់ជំនួយទឹកប្រាក់ ១២លានដុល្លារ សម្រាប់ការឆ្លើយតបជាបន្ទាន់ និងការស្តារឡើងវិញ នៅក្នុងប្រទេសកោះវ៉ានូអាទូ ពោលគឺមានរយៈពេលមួយសប្តាហ៍បន្ទាប់ពីការរញ្ជួយដីកម្រិត ៧,៣រ៉ិចទ័រ បានសម្លាប់មនុស្សយ៉ាងហោចណាស់ ១៤នាក់ និងបំផ្លិចបំផ្លាញអគារជាច្រើនខ្នង ព្រមទាំងកាត់ផ្តាច់ការផ្គត់ផ្គង់ចរន្តអគ្គិសនី និងទឹក។

នាយកធនាគារពិភពលោក ប្រចាំតំបន់ប៉ាស៊ីហ្វិក និងប៉ាពួញ៉ូវហ្គីណេ លោក Stephen N. Ndegwa (ស្តេហ្វេន អេន ដេហ្គ្វា) បានឲ្យដឹងនៅក្នុងសេចក្តីថ្លែងការណ៍ថា ទំហំនៃគ្រោះមហន្តរាយ បាន និងកំពុងបំផ្លិចបំផ្លាញប្រទេសវ៉ានូអាទូ ហើយនឹងប៉ះពាល់ដល់សេដ្ឋកិច្ចយ៉ាងធ្ងន់ធ្ងរ។

លោក Ndegwa បាននិយាយថា៖ «យើងសង្ឃឹមថា ជំនួយនេះនឹងរួមចំណែកដល់ការស្តារឡើងវិញយ៉ាងឆាប់រហ័សរបស់ប្រទេសវ៉ានូអាទូ ស្តារការងារឡើងវិញ និងផ្តល់ជំនួយដ៏សំខាន់ដល់អ្នកដែលត្រូវការវាខ្លាំងបំផុត»។

គ្រោះរញ្ជួយដីបានបង្កការខូចខាតយ៉ាងធ្ងន់ធ្ងរដល់រដ្ឋធានី Port Vila របស់ប្រទេសវ៉ានូអាទូ ហើយតំបន់ទីប្រជុំជន ឥឡូវនេះត្រូវបានបិទជាសាធារណៈ។ មន្ទីរពេទ្យ Vila Central បានប្រាប់ឲ្យដឹងថា មនុស្ស ១៤នាក់ បានបាត់បង់ជីវិត ហើយជាង ២១០នាក់បានរងរបួស៕