នាយករដ្ឋមន្ត្រីចាំផ្ទះលីបង់ លោក Najib Mikati កាលពីថ្ងៃចន្ទ (ទី២៣ ខែធ្នូ) បាននិយាយថា ប្រទេសលីបង់នឹងសហការជាមួយនឹងសំណើរបស់ Interpol (អ៊ិនធឺប៉ូល) (អង្គការនគរបាលឧក្រិដ្ឋកម្មអន្តរជាតិ) ដើម្បីចាប់ខ្លួនអតីតមន្ត្រីចារកម្មស៊ីរី លោក Jamil Hassan ដែលត្រូវបានចោទប្រកាន់ដោយអាជ្ញាធរអាមេរិកពីបទឧក្រិដ្ឋកម្មសង្គ្រាម ក្រោមការដឹកនាំរបស់រដ្ឋាភិបាលលោក Bashar al-Assad ដែលត្រូវបានផ្ដួលរំលំ។

ប្រភពតុលាការរបស់លីបង់ចំនួន ៣រូប បានប្រាប់សារព័ត៌មាន Reuters ថា កាលពីសប្តាហ៍មុន ប្រទេសលីបង់បានទទួលការជូនដំណឹងជាផ្លូវការពី Interpol ដោយជំរុញឲ្យអាជ្ញាធរតុលាការ និងសន្តិសុខឃុំខ្លួនលោក Hassan ដែលទីកន្លែងលាក់ខ្លួននៅតែមិនទាន់ដឹងច្បាស់ ប្រសិនបើជននោះត្រូវបានរកឃើញនៅលើដែនដីលីបង់។

លោក Mikati បានប្រាប់សារព័ត៌មាន Reuters ថា៖ «យើងប្តេជ្ញាសហការជាមួយនឹងសំណើរបស់ Interpol ទាក់ទងនឹងការចាប់ខ្លួននាយកស៊ើបការណ៍របស់កងកម្លាំងអាកាសស៊ីរី ខណៈដែលយើងបន្តកិច្ចសហប្រតិបត្តិការលើគ្រប់បញ្ហាទាក់ទងនឹងប្រព័ន្ធអន្តរជាតិ»។

ប្រភពដដែលទាំងនោះ បានឲ្យដឹងទៀតថា សេចក្តីណែនាំក៏បានអំពាវនាវឲ្យមានការចាប់ខ្លួនលោក Hassan ប្រសិនបើគាត់ចូលទៅក្នុងប្រទេសលីបង់ ដោយគោលបំណងចុងក្រោយ គឺធ្វើបត្យាប័នជននោះទៅសហរដ្ឋអាមេរិក។

គួរបញ្ជាក់ថា កាលពីថ្ងៃទី៩ ខែធ្នូ ការចោទប្រកាន់របស់សហរដ្ឋអាមេរិក ដែលត្រូវបានចេញផ្សាយ ចោទប្រកាន់លោក Hassan វ័យ ៧២ឆ្នាំ ពីបទប្រព្រឹត្តឧក្រិដ្ឋកម្មសង្គ្រាម ក្នុងនោះរួមទាំងការធ្វើទារុណកម្មអ្នកជាប់ឃុំឃាំង ដែលខ្លះជាពលរដ្ឋអាមេរិក អំឡុងសង្គ្រាមស៊ីវិលស៊ីរី។

ហើយយោងតាមប្រភពតុលាការរបស់លីបង់ បានឲ្យដឹងថា ដីកាចាប់ខ្លួនរបស់ Interpol បានចោទប្រកាន់លោក Hassan ពីបទជាប់ពាក់ព័ន្ធនឹង «ឧក្រិដ្ឋកម្មនៃការសម្លាប់ ធ្វើទារុណកម្ម និងអំពើប្រល័យពូជសាសន៍»៕