ប្រទេសអ៊ីស្រាអែលបានប្រាប់បេសកកម្មការទូតរបស់ខ្លួន នៅអឺរ៉ុប ប្រឹងប្រែងធ្វើឲ្យក្រុមឧទ្ទាមដែលគាំទ្រដោយអ៊ីរ៉ង់ គឺក្រុមហ៊ួទី នៅយេម៉ែន ត្រូវបានចាត់ទុកថា ជាអង្គការភេរវជន។

គួរបញ្ជាក់ថា ក្រុមហ៊ួធី បានបាញ់បង្ហោះយានដ្រូន និងមីស៊ីលហើយម្តងទៀត ទៅអ៊ីស្រាអែល ជាអ្វីដែលក្រុមនេះពណ៌នាថា ជាសកម្មភាពបង្ហាញសាមគ្គីភាពជាមួយប៉ាឡេស្ទីន ដែលកំពុងប្រយុទ្ធជាមួយកងកម្លាំងអ៊ីស្រាអែល នៅតំបន់ហ្កាហ្សា។

ជាមួយគ្នានេះ ការវាយប្រហាររបស់ពួកគេ បានរំខានដល់ផ្លូវដឹកជញ្ជូនអន្តរជាតិ ដោយបង្ខំឲ្យក្រុមហ៊ុននានាប្ដូរទៅធ្វើដំណើរលើផ្លូវដែលមានចម្ងាយឆ្ងាយជាង និងចំណាយថ្លៃជាង ដែលបង្កជាក្ដីបារម្ភខ្លាំងឡើងៗពីការមានអតិផរណាសកល។

រដ្ឋមន្ត្រីការបរទេស លោក Gideon Sa'ar បានលើកឡើងនៅក្នុងសេចក្តីថ្លែងការណ៍ថា៖ «ក្រុមហ៊ួធី បង្កជាការគំរាមកំហែង មិនត្រឹមតែដល់អ៊ីស្រាអែលប៉ុណ្ណោះទេ តែថែមទាំងដល់តំបន់ និងពិភពលោកទាំងមូលទៀតផងដែរ។ រឿងដំបូង និងជាមូលដ្ឋានបំផុតដែលត្រូវធ្វើ គឺដាក់ក្រុមនេះចូលក្នុងបញ្ជីអង្គការភេរវជន»។

យោងតាមលោក Sa'ar បានឲ្យដឹងថា សហរដ្ឋអាមេរិក អារ៉ាប៊ីសាអ៊ូឌីត ម៉ាឡេស៊ី អេមីរ៉ាត់អារ៉ាប់រួម អូស្ត្រាលី កាណាដា នូវ៉ែលហ្សេឡង់ និងអ៊ីស្រាអែល បច្ចុប្បន្ន ចាត់ទុកក្រុមហ៊ួធីជាភេរវករ។

កាលពីថ្ងៃសៅរ៍ចុងសប្ដាហ៍កន្លងមក យោធាអ៊ីស្រាអែល បានបរាជ័យក្នុងការស្ទាក់ចាប់មីស៊ីលបាញ់ចេញពីប្រទេសយេម៉ែនដែលបានធ្លាក់នៅតំបន់ Tel Aviv-Jaffa ដោយបានធ្វើឲ្យមនុស្ស ១៤នាក់រងរបួស៕