ក្រសួងសុខាភិបាលនៃដែនដីហ្កាហ្សា បាននិយាយកាលពីថ្ងៃអង្គារ (២៤ ធ្នូ) ថា កងទ័ពអ៊ីស្រាអែល បានបង្ខំឱ្យមានការជម្លៀសចេញពីមន្ទីរពេទ្យឥណ្ឌូណេស៊ី នៅភាគខាងជើងហ្កាហ្សា ហើយអ្នកជំងឺជាច្រើននាក់ ដែលខ្លះធ្វើដំណើរដោយថ្មើរជើង បានទៅដល់មន្ទីរពេទ្យមួយផ្សេងទៀតដែលនៅចម្ងាយរាប់គីឡូម៉ែត្រពីទីក្រុងហ្កាហ្សា។

មន្ទីរពេទ្យឥណ្ឌូណេស៊ីនោះ គឺជាកន្លែងថែទាំសុខភាពមួយក្នុងចំណោមមន្ទីរពេទ្យមួយចំនួនរបស់តំបន់ហ្កាហ្សាស្ទ្រីប ដែលនៅតែដំណើរការដោយផ្នែក នៅជាយភាគខាងជើងរបស់ខ្លួន ជាតំបន់ដែលស្ថិតនៅក្រោមសម្ពាធយោធាអ៊ីស្រាអែល ដ៏ខ្លាំងក្លាអស់ពេលជិត ៣ខែ។

អ៊ីស្រាអែលនិយាយថា ប្រតិបត្តិការរបស់ខ្លួននៅជុំវិញសហគមន៍ហ្កាហ្សា ភាគខាងជើងចំនួន៣ ជុំវិញមន្ទីរពេទ្យនោះគឺតំបន់ បេតឡាហ៊ីយ៉ា (Beit Lahiya), បេត ហានួន (Beit Hanoun) និង ចាបាលីយ៉ា (Jabalia) ដើម្បីកំណត់គោលដៅលើក្រុមសកម្មប្រយុទ្ធហាម៉ាស។

សេចក្តីថ្លែងការណ៍របស់យោធាអ៊ីស្រាអែល និយាយថា មន្ទីរពេទ្យឥណ្ឌូណេស៊ី កំពុងត្រូវបានប្រើប្រាស់ដោយអ្នកប្រយុទ្ធដើម្បីបើកការវាយប្រហារប្រឆាំងនឹងកងទ័ពអ៊ីស្រាអែល ហើយថាខ្លួន "សម្រួលដល់ការជម្លៀសប្រកបដោយសុវត្ថិភាពនៃជនស៊ីវិល បុគ្គលិកពេទ្យ និងអ្នកជំងឺពីតំបន់នោះ ទាំងមុន និងអំឡុងពេលប្រតិបត្តិការ"។ ពលរដ្ឋប៉ាឡេស្ទីន ចោទអ៊ីស្រាអែល ថាចង់ជម្លៀសប្រជាជននៅភាគខាងជើងហ្កាហ្សាជាអចិន្ត្រៃយ៍ដើម្បីបង្កើតតំបន់ទ្រនាប់ ប៉ុន្តែអ៊ីស្រាអែលបដិសេធ៕