បណ្ដាមេដឹកនាំជួរមុខនៃរដ្ឋជាសមាជិកណាតូចំនួនបី បានប្រាប់សារព័ត៌មាន The Independent ថាសម្ព័នន្ធយោធាណាតូពុំទាន់ត្រៀមខ្លួនទប់ទល់នឹងមេដឹកនាំរុស្ស៊ីលោក Vladimir Putin ដោយគ្មានសហរដ្ឋអាមេរិកនៅឡើយទេ ខណៈពួកលោកបានអំពាវនាវឱ្យសម្ព័ន្ធមិត្តបង្កើនការចំណាយលើវិស័យការពារជាតិ។  

បន្ទាប់ពីជ័យជម្នះរបស់លោក Donald Trump ក្នុងការបោះឆ្នោតប្រធានាធិបតីអាមេរិក ក្រុមមេដឹកនាំនៃប្រទេសឡាតវី អេស្តូនី និងហ្វាំងឡង់ បានជំរុញឱ្យសម្ព័ន្ធភាពនេះ បញ្ឈប់ការជជែកវែកញែកមិនចេះចប់ពីរបៀបទប់ទល់ការគំរាមកំហែងកំពុងកើនឡើងរបស់រុស្ស៊ី ដោយនិយាយថាដល់ពេលត្រូវពង្រឹងការការពាររបស់អឺរ៉ុបខ្លួនឯងហើយ។

លោកអេដ ហ្ការ រីនកេវីកស៍ (Edgars Rinkevics) ប្រធានាធិបតីរបស់ប្រទេសឡាតវី និយាយថា វាច្បាស់ណាស់ថាយើងមិនទាន់បានត្រៀមខ្លួនរួចរាល់នៅឡើយទេ ។យើងមិនអាចរក្សាក្ដីសង្ឃឹមយ៉ាងសាមញ្ញចំពោះស្ថានភាពដែលអាមេរិកនៅតែមានការពាក់ព័ន្ធច្រើននៅអឺរ៉ុបនោះទេ។ 

ចំណែកលោកនាយករដ្ឋមន្ត្រីអេស្តូនី គ្រីស្តេន មីឆាល(Kristen Michal) បន្ថែមថាយើងត្រូវបង្កើនសមត្ថភាពការពារជាតិរបស់យើង ដោយសារតែការគំរាមកំហែងរបស់រុស្ស៊ី ។

ប្រទេសទាំងបីគឺជាសមាជិកណាតូតែមួយគត់មានព្រំប្រទល់ជាប់ប្រទេសរុស្ស៊ីជាព្រំដែនដែលមានចម្ងាយ ១.២០០ ម៉ាយល៍ពីចុងភាគខាងជើងនៃប្រទេសហ្វាំងឡង់ ជាប់ជ្រុងភាគអាគ្នេយ៍នៃប្រទេសឡាតវី ដែលមានព្រំប្រទល់ជាប់ប្រទេសបេឡារុស ជារដ្ឋសម្ព័ន្ធមិត្តរបស់រុស្ស៊ី ដែលត្រូវបានប្រើប្រាស់ដោយទីក្រុងមូស្គូជាទីតាំងវាយលុកលើអ៊ុយក្រែន៕