អូឡាំពិក៖ សិក្សាជំរុញការផ្សព្វផ្សាយស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ ស្ដីពីតួនាទីសារព័ត៌មានកីឡាតាមរយៈបទពិសោធន៍ជនជាតិជប៉ុន ត្រូវបានប្រារព្ធពិធីបើកជាផ្លូវការនៅព្រឹកថ្ងៃទី១ ខែវិច្ឆិកា ឆ្នាំ២០២១ នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC)។
ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC មានប្រសាសន៍ថា នេះជាវគ្គបណ្តុះបណ្តាលដ៏សំខាន់មួយ ស្របតាមផែនការមេស៊ីហ្គេមលើកទី៣២ ឆ្នាំ២០២៣ របស់ CAMSOC ដើម្បីលើកកម្ពស់បន្ថែមដល់ការផ្សព្វផ្សាយព័ត៌មានឲ្យកាន់តែទូលំទូលាយ ស៊ីជម្រៅ ក៏ដូចជាបន្ថែមនូវគុណតម្លៃដល់ព្រឹត្តិការណ៍ស៊ីហ្គេម-អាស៊ានប៉ារ៉ាហ្គេមឆ្នាំ២០២៣ ជាប្រវត្តិសាស្ត្រជាលើកដំបូងរបស់ព្រះរាជាណាចក្រកម្ពុជា។ ឯកឧត្តមអគ្គលេខាធិការបានចាត់ទុកថា សារព័ត៌មានគឺជាផ្នែកដ៏សំខាន់ក្នុងការជ្រោមជ្រែងដល់ការផ្សព្វផ្សាយក្នុងព្រឹត្តិការណ៍មួយឲ្យកាន់តែល្បីល្បាញ ទាំងថ្នាក់ជាតិ និងអន្តរជាតិ។ បើសិនជាគ្មានសារព័ត៌មាន មិនបានចូលរួមផ្សព្វផ្សាយពីព្រឹត្តិការណ៍កីឡាណាមួយនោះទេ នោះនឹងធ្វើឲ្យព្រឹត្តិការណ៍នោះខ្វះគ្រឿងផ្សំ។ ដូច្នេះការប្រកួតកីឡាអាចរីកចម្រើន ឬអាចទទួលបានការគាំទ្រពីមហាជន និងពីមនុស្សជាតិនៅលើពិភពលោកនេះទៅបាន អាស្រ័យដោយមានការចូលរួមផ្សព្វផ្សាយពីគុណតម្លៃ ពីបណ្តាសារព័ត៌មាននេះហើយ។ «អាចក្លាយទៅជាអ្នកសារព័ត៌មានកីឡាបាន គឺអ្នកសារព័ត៌មានត្រូវដាក់បេះដូងជាកីឡាករសិន បើកាលណាអ្នកនិពន្ធព័ត៌មានកីឡាដាក់បេះដូចក្នុងភាពជាកីឡាករ នោះអ្នកសារព័ត៌មានកីឡាទាំងអស់អាចនិពន្ធអត្ថបទ ឬអត្ថាធិប្បាយបាននូវព័ត៌មានកីឡាប្រកបដោយវិជ្ជាជីវៈ និងស៊ីជម្រៅល្អ។
«ជាមួយគ្នានោះ អ្នកសារព័ត៌មានកីឡាក៏ត្រូវស្គាល់អំពីគុណតម្លៃ គោលដៅ និងគោលការណ៍លេងដោយយុត្តិធម៌ (Fair-Play) ក្នុងវិស័យកីឡាដែរ ដើម្បីធ្វើឲ្យគុណតម្លៃកីឡាអាចត្រូវបានបញ្ជ្រាបការផ្សព្វផ្សាយ ទៅកាន់មហាជនប្រកបដោយវិជ្ជាជីវៈច្បាស់លាស់ និងត្រឹមត្រូវតាមគោលការណ៍កីឡា។ ជាមួយគ្នានោះ អ្នកសារព័ត៌មានក៏ដូចជាប្រជាពលរដ្ឋទាំងអស់គឺជាម្ចាស់ផ្ទះស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ ទាំងអស់គ្នា មិនមែនជារបស់អ្នកណាម្នាក់នោះឡើយ ដូច្នេះហើយឯកឧត្តម វ៉ាត់ ចំរើន ស្នើឲ្យអ្នកទាំងអស់គ្នាស្វែងយល់អំពីតួនាទី ភារកិច្ច កាតព្វកិច្ចរបស់ខ្លួន ក្នុងគោលដៅជំរុញឲ្យការទទួលធ្វើម្ចាស់ផ្ទះនេះ ទទួលបានជោគជ័យជាប្រវត្តិសាស្ត្រ»។ សូមជម្រាបជូនថា វគ្គសិក្សានេះមានរយៈពេល ៤ថ្ងៃហើយនឹងបញ្ចប់នៅថ្ងៃទី៤ ខែវិច្ឆិកាខាងមុខ៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
