ក្រុមមន្ត្រីបារាំង បាននិយាយថា ចំនួនអ្នកស្លាប់នៅកោះ ម៉ាយ៉ត់ (Mayotte) ឡើងដល់ ៣៩នាក់ ជាង ១០ថ្ងៃបន្ទាប់ពីកោះនេះត្រូវបានវាយលុកដោយព្យុះស៊ីក្លូនដ៏បំផ្លិចបំផ្លាញ ខណៈតួលេខអ្នកស្លាប់ពិតប្រាកដ នៅតែមិនទាន់អាចបញ្ជាក់បាននៅឡើយ។

អាជ្ញាធរនិយាយថា មនុស្សរាប់ពាន់នាក់អាចនឹងស្លាប់នៅក្នុងព្យុះ ឈីដូ (Chido) នៅពេលបោកបក់លើកោះ ដែលជាតំបន់ក្រៅប្រទេសរបស់បារាំង នៅឆ្នេរសមុទ្រនៃអាហ្វ្រិកខាងកើត។ អាជ្ញាធរប្រាប់ថា កិច្ចប្រឹងប្រែងរាប់ចំនួនអ្នកស្លាប់អាចមានភាពស្មុគស្មាញ ដោយសារអ្នកស្រុកបញ្ចុះសពសាច់ញាតិពួកគេភ្លាមៗតាមទំនៀមទម្លាប់សាសនា ហើយក៏ដោយសារការពិតដែលថាអ្នកស្លាប់ជាច្រើនអាចជាជនអន្តោប្រវេសន៍ដែលគ្មានឯកសារ។

ល្បឿនដ៏យឺតនៃជំនួយ និងការមកដល់នៃទឹកស្អាត ដែលជាចំណុចដ៏ក្ដៅគគុកសូម្បីតែមុនពេលមានគ្រោះមហន្តរាយនេះក៏ដោយ បានធ្វើឱ្យអ្នកស្រុកខឹងសម្បារយ៉ាងខ្លាំងនៅទូទាំងកោះ Mayotte ដែលជាដែនដីក្រីក្របំផុតរបស់បារាំង ស្ថិតនៅចន្លោះប្រទេសម៉ាដាហ្គាស្ការ និងម៉ូហ្សំប៊ិក។

វេជ្ជបណ្ឌិតម្នាក់ឈ្មោះលោក Mohamed Abdou បានហៅទិវាជាតិនៃការកាន់ទុក្ខដែលបារាំងប្រកាសសម្រាប់ជនរងគ្រោះនៅ Mayotte ថាជា "ការបំភាន់ផ្នែកនយោបាយ" ស្របពេលមានរបាយការណ៍ពីការធ្វេសប្រហែសជាប្រវត្តិសាស្ត្រ ជុំវិញហេដ្ឋារចនាសម្ព័ន្ធ អគ្គិសនី និងការចែកចាយជំនួយ ខណៈអ្នកស្រុកផ្សេងទៀតបានជះកំហឹងដាក់លោកប្រធានាធិបតី Emmanuel Macron ក្នុងអំឡុងពេលទស្សនកិច្ចរបស់លោកកាលពីសប្តាហ៍មុន៕