អង្គការរ៉ូហ៊ីងយ៉ាជាច្រើននៅទូទាំងពិភពលោក បានអំពាវនាវឱ្យមាន "សន្តិភាព យុត្តិធម៌ សមភាព ការរួមរស់ដោយសន្តិភាព ឬសន្តិសហវិជ្ជមាន និងអភិបាលកិច្ចបែបបរិយាបន្ន" នៅក្នុងរដ្ឋរ៉ាឃីន (Rakhine) នៅឆ្នេរភាគខាងលិចនៃសហភាពមីយ៉ាន់ម៉ា ខណៈជម្លោះរវាងកងកម្លាំងយោធារបបសឹក និងក្រុមឧទ្ទាម អារ៉ាកាន (Arakan) កាន់តែតានតឹង។

អង្គការរ៉ូហ៊ីងយ៉ា ២៨ក្រុម បានចេញសេចក្តីថ្លែងការណ៍រួមមួយកាលពីថ្ងៃចន្ទ (២៣ ធ្នូ) ដោយអំពាវនាវដល់កងទ័ពឧទ្ទាមអារ៉ាកាន ដែលបានដណ្តើមកាន់កាប់ទីប្រជុំជន មួងដាវ (Maungdaw) និង ប៊ូធូឌួង (Buthidaung) នៅភាគខាងជើងរដ្ឋរ៉ាឃីន ឱ្យ "លើកកម្ពស់ និងគោរពសិទ្ធិជនជាតិរ៉ូហ៊ីងយ៉ា និងជនជាតិភាគតិចទាំងអស់" នៅក្នុងរដ្ឋដែលមានព្រំប្រទល់ជាប់បង់ក្លាដែសមួយនេះ។

តំបន់ Cox's Bazar ភាគអាគ្នេយ៍របស់បង់ក្លាដែស ជាជម្រករបស់ជនជាតិរ៉ូហ៊ីងយ៉ាជាង ១,២លាននាក់។ ការបង្រ្កាបដោយយោធានៅខែសីហា ឆ្នាំ២០១៧ បានជំរុញឱ្យជនមូស្លីមរ៉ូហ៊ីងយ៉ាភាគច្រើន ភៀសខ្លួនចេញពីមីយ៉ាន់ម៉ា។

ទោះជាយ៉ាងនេះក្ដី ភាគច្រើននៃជនជាតិរ៉ូហ៊ីងយ៉ា ដែលនៅសេសសល់ចំនួន ៥០០.០០០នាក់ នៅតែបន្តរស់នៅក្នុងទឹកដីរ៉ាឃីន ដែលគ្រប់គ្រងដោយកងទ័ពអារ៉ាកាន ខណៈក្រុមឧទ្ទាមនេះបានគ្រប់គ្រងទាំងស្រុងនូវតំបន់ព្រំដែនជាមួយបង់ក្លាដែស៕