ប្រទេសអាហ្រ្វិកខាងត្បូង កាលពីថ្ងៃអង្គារ បានបង្ហាញការព្រួយបារម្ភជុំវិញការកើនឡើងការតវ៉ានៅក្នុងប្រទេសម៉ូហ្សំប៊ិក ដោយអំពាវនាវឱ្យមានកិច្ចសន្ទនាបន្ទាន់ នៅក្នុងប្រទេសនេះ។

ក្រសួងទំនាក់ទំនងអន្តរជាតិ និងសហប្រតិបត្តិការ (DIRCO) បាននិយាយនៅក្នុងសេចក្តីថ្លែងការណ៍ ថា «បន្ទាប់ពីការប្រកាសលទ្ធផលបោះឆ្នោតចុងក្រោយដោយក្រុមប្រឹក្សាធម្មនុញ្ញរបស់ប្រទេសម៉ូហ្សំប៊ិក ប្រទេសអាហ្រ្វិកខាងត្បូង មានការព្រួយបារម្ភអំពីអំពើហិង្សាដែលកំពុងបន្ត និងការតវ៉ារំខាន ជាបន្តបន្ទាប់ ក្នុងប្រតិកម្មទៅនឹងការប្រកាសលទ្ធផល។

ក្រសួងបាននិយាយក្នុងសេចក្តីថ្លែងការណ៍បន្ថែមថា «ប្រទេសអាហ្វ្រិកខាងត្បូង អំពាវនាវឱ្យគ្រប់ភាគីទាំងអស់ ប្តេជ្ញាចិត្តក្នុងការសន្ទនាជាបន្ទាន់ ដែលនឹងជួយស្តារ និងកំណត់នៅលើគន្លងនយោបាយ និងការអភិវឌ្ឍន៍ថ្មី»។

ក្រសួងទំនាក់ទំនងអន្តរជាតិ និងសហប្រតិបត្តិការ (DIRCO) និយាយថា ប្រទេសអាហ្រ្វិកខាងត្បូង ត្រៀមខ្លួនជាស្រេចដើម្បីជួយប្រទេសម៉ូហ្សំប៊ិក ក្នុងការសម្របសម្រួលកិច្ចសន្ទនានេះ។

រដ្ឋាភិបាលប្រទេសអាហ្រ្វិកខាងត្បូង នឹងបន្តធ្វើការជាមួយសហគមន៍អភិវឌ្ឍន៍អាហ្វ្រិកខាងត្បូង និងទីភ្នាក់ងារពហុភាគីផ្សេងទៀត ដើម្បីគាំទ្រដំណោះស្រាយយូរអង្វែងចំពោះភាពជាប់គាំងនៅពេលបច្ចុប្បន្ន។